ვეტო იქნება დაძლეული ძალიან მშვიდ და ნორმალურ მდგომარეობაში, მაგრამ აუცილებლად იქნება ყურადსაღები ის შენიშვნები, რომლებიც მან გადმოაგზავნა, – ამის შესახებ საპარლამენტო უმრავლესობის წევრმა ნუკრი ქანთარიამ განაცხადა, რითაც საქართველოს პრეზიდენტ გიორგი მარგველაშვილის მიერ სასამართლო რეფორმასთან დაკავშირებულ საკანონმდებლო პაკეტზე ვეტოს დადებას გამოეხმაურა.
”არ ვიტყვი, რა თქმა უნდა, იმას, რომ პრეზიდენტს ვეტო მოენატრა და ახლა ამიტომ გამოიყენა ეს უფლება, თუმცა, ალბათ, არც ეს არ არის შორს, მაგრამ ამ შემთხვევაში აზრთა სხვადასხვაობა იყო იმ ნაწილზე, რაზეც მან გაამახვილა ყურადღება. ეს ეხება მოსამართლეების არჩევას, გამოსაცდელ ვადას და ა.შ. მოხდება ამის თავიდან განხილვა. თუ ჩვენ შევაფასებთ, რომ მიზანშეწონილია მისი ცვლილებების გაზიარება, გავიზიარებთ ამ ცვლილებებს. თუ არ გავიზიარებთ, ის დრო ნამდვილად აღარ არის, როცა ვეტოზე იყო ამტყდარი პანიკური მდგომარეობა – დაძლევენ თუ ვერა, ”რესპუბლიკელები” მისცემენ თუ არა ხმას და ა.შ. ახლა ეს პრობლემა ნამდვილად არ არის. ვეტო იქნება დაძლეული ძალიან მშვიდ და ნორმალურ მდგომარეობაში, მაგრამ აუცილებლად იქნება ყურადსაღები ის შენიშვნები, რომლებიც მან გადმოაგზავნა და ამის შემდეგ იქნება გადაწყვეტილება მიღებული”, – განაცხადა ალექსანდრე ქანთარიამ.
საქართველოს პრეზიდენტმა გიორგი მარგველაშვილმა ვეტო დაადო სასამართლო რეფორმასთან დაკავშირებულ საკანონმდებლო პაკეტს, რომელიც პარლამენტმა პრეზიდენტს ხელმოსაწერად გადაუგზავნა.