ტოკიოს პოლიცია იაპონიაში საქართველოს ელჩის, თეიმურაზ ლეჟავას მძღოლზე შესაძლო თავდასხმას იძიებს. ამის შესახებ ინფორმაციას იაპონიის საზოგადოებრივი მაუწყებელი ავრცელებს.
გავრცელებული ცნობით, უცნობი მამაკაცი ელჩის მანქანის წინ გაჩერდა და მძღოლის მხრიდან კარი გააღო. ინციდენტის შედეგად, არც საქართველოს ელჩი და არც მძღოლი არ დაშავებულან.
საქართველოს ელჩმა იაპონიაში ჟურნალისტებთან საუბარში თქვა, რომ თავდამსხმელი ყვიროდა, თუ რომელი ქვეყნიდან იყვნენ ავტომობილში მსხდომი პირები. ქართველი დიპლომატის თქმით, არ იცის, იყო თუ არა მასზე მიზანმიმართული თავდასხმა, თუმცა დასძინა, რომ ძალადობა მიუღებელია.
იაპონური მედიის ცნობით, საქართველოს ელჩმა აღნიშნა, რომ საერთაშორისო თანამეგობრობაში სხვების პატივისცემა მნიშვნელოვანია და არსებითია. საელჩოს ავტომობილზე თავდასხმის შესახებ ვიდეოს აქვეყნებს თავად თეიმურაზ ლეჟავაც და აცხადებს, რომ მოუთმენლად ელოდება იაპონიის სამართალდამცავ ორგანოებთან შესაბამის თანამშრომლობას.
突如大使車のドアをあけられ攻撃されましたが、これはひどいです。
大使館のドライバーの冷静な対応に感謝します。
日本の法執行機関のしかるべきご協力に期待します。 pic.twitter.com/ZJkxffmfCx
— ティムラズ・レジャバ駐日ジョージア大使 (@TeimurazLezhava) July 14, 2023