სიყვარულით, სიკეთით სავსე ადამიანი გამოგვაკლდა კიდევ საფრანგეთის ქართულ ემიგრაციაში. ანიკ ვიქტორის ასული ხომერიკი-დავრიშაშვილისა. ნოე ხომერიკის შვილიშვილი – არაჩვეულებრივი ქალბატონი, მშვენიერი, ელეგანტური და საქართველოს დიდი გულშემატკივარი, – ამის შესახებ საფრანგეთში საქართველოს ელჩი გოჩა ჯავახიშვილი წერს.
“როგორ მიხარია, როცა კარგ ამბებს გახარებთ ხოლმე, მაგრამ სიკვდილი, სიცოცხლის დასაფასებლად თუ არსებობს, დრო და დრო ჩაგვაფიქრებს ხოლმე, ამ წუთისოფლის რაობაზე.
როგორ გვჭირდება სიყვარული, ერთმანეთისთვის სითბოსა და პოზიტივის გასაზიარებლად, რომ სიცოცხლის დასაფასებლად სიკვდილის ინაბარა არ ვიყოთ.
აი, ასეთი, სითბო-სიყვარულით, სიკეთით სავსე ადამიანი გამოგვაკლდა კიდევ საფრანგეთის ქართულ ემიგრაციაში. ანიკ ვიქტორის ასული ხომერიკი, დავრიშაშვილისა. ნოე ხომერიკის შვილიშვილი- არაჩვეულებრივი ქალბატონი, მშვენიერი, ელეგანტური და საქართველოს დიდი გულშემატკივარი.
მისი მზერიდან იგრძნობდით რა სითბო და სიყვარული იღვრებოდა მისი ეშხიანი თვალებიდან. თითქოს მზერით, უსიტყვოდ გეფერებოდა.
არაჩვეულებრივი შვილები გაზარდა, ქეთევანი (ცნობილი მწერალი) და ნათელა (მომღერალი, მუსიკოსი).
შეუერთდა ჩვენი ძვირფასი ანიკი ზეციურ ქართულ ემიგრაციას! ოთხშაბათს მისი საყვარელი, უმცროსი მაზლი, მამა არჩილი გადაუხდის პანაშვიდს და წინაპართა გვერდით სამუდამოდ დაივანებს ლევილის ქართველ მამულიშვილთა სასაფლაოზე.
აცხონოს და განუსვენოს უფალმა ძვირფასი ადამიანი”, – წერს გოჩა ჯავახიშვილი.
