მიხეილ ჯანელიძე – წლევანდელი წელი ძალიან აქტიური იქნება ნატო-საქართველოს ურთიერთობებში

მიხეილ ჯანელიძე – წლევანდელი წელი ძალიან აქტიური იქნება ნატო-საქართველოს ურთიერთობებში წლევანდელი წელი ძალიან აქტიური იქნება ნატო-საქართველოს ურთიერთობებში, – ამის შესახებ ჟურნალისტებს საგარეო საქმეთა მინისტრმა მიხეილ ჯანელიძემ განუცხადა.
მიხეილ ჯანელიძის თქმით, ქართული მხარე ყველაფერს აკეთებს, რომ საქართველოს საკითხი აქტიურად იდგეს ნატო-ს დღის წესრიგში. მისივე განცხადებით, აჟიოტაჟი, რომელიც ოპოზიციურმა პარტიებმა, რიგმა არასამთავრობო ორგანიზაციებმა და ექსპერტთა ნაწილმა ატეხა, უსაფუძვლოა.
„საქართველოს მთავრობას და საქართველოს აქვს ყველაზე ღრმა და ყოვლისმომცველი პარტნიორობა როგორც ასპირანტ ქვეყანას ნატო-სთან. ჩვენ ვართ წარმოდგენილი ყველა იმ ფორმატში, სადაც წარმოდგენილნი არიან პარტნიორები. წელს იანვარში უკევე გაიმართა ნატო-საქართველოს კომისიის ორი სხდომა, წლევანდელი წელი იქნება ძალიან აქტიური ნატო-საქართველოს ურთიერთობებში. წელს ველოდებით თავდაცვის მინისტერიალს, რომლის ფარგლებშიც გაიმართება საქართველო-ნატო-ს კომისიის სხდომა საქართველოს თავდაცვის მინისტრის მონაწილეობით და უნდა აღინიშნოს, რომ თავდაცვის მინისტერიალს დაესწრება ამერიკის შეერთებული შტატების თავდაცვის ახალი მდივანი. შესაბამისად, ძალიან მნიშვნელოვანი იქნება ეს მინისტერიალი. ასევე იგეგმება ნატო-ს საპარლამენტო ასამბლეა საქართველოში და სხვა ორმხრივი შეხვედრები. ჩვენ ვაკეთებთ ყველაფერს, რომ საქართველოს საკითხი იდგეს აქტიურად ნატო-ს დღის წესრიგში და ეს დასტურდება ნატო-ს გენერალური მდივნის, გენერალური მდივნის სპეციალური წარმომადგენლის ჯეიმს აპატურაის და სხვა ოფიციალური პირების განცხადებებით. მინდა ხაზი გავუსვა, რომ ის აჟიოტაჟი, რომელიც გუშინ ატყდა ოპოზიციური პარტიების, არასამთავრობო ორგანიზაციებისა და რიგი ექსპერტების მხრიდან, აბსოლუტურად უსაფუძვლოა. მათაც კარგად მოეხსენებათ, რამხელა პროგრესია ევროპულ და ევროატლანტიკურ გზაზე“, – განაცხადა მიხეილ ჯანელიძემ.