საქართველოს კულტურისა და ძეგლთა დაცვის სამინისტროს ინიციატივითა და საქართველოს მთავრობის გადაწყვეტილებით, ქართულ ჭიდაობას ეროვნული მნიშვნელობის კატეგორიის სტატუსი განესაზღვრა.
“საქართველოს მთავრობის გადაწყვეტილება ქართული ჭიდაობისთვის ეროვნული მნიშვნელობის კატეგორიის სტატუსის მინიჭებაზე ძალიან მნიშვნელოვანია და ხელს შეუწყობს ჭიდაობის პოპულარიზაციას და განვითარებას. გვახარებს ისფაქტი, რომ სპორტის ეს სახეობა ბევრ ქვეყანაში უკვე ძალიან პოპულარულია, რისი ნათელი დადასტურებაც წლევანდელი ფალავნობაა, რომელშიც მსოფლიოს სხვადასხვა ქვეყნის არაერთმა სპორტსმენი მონაწილეობდა. დარწმუნებული ვარ, შემდგომ წლებში ქართული ჭიდაობა კიდევ უფრო პოპულარული გახდება, რადგან ის მოჭიდავეები, რომლებიც ქართულ ჭიდაობას ჭიდაობენ, წარმატებას აღწევენ მსოფლიოს ასპარეზზე, ევროპის და მსოფლიოს ჩემპიონატებზე, ოლიმპიურ თამაშებზე. ჩვენი მხრივ გპირდებით, რომ სამინისტრო მაქსიმალურად დაეხმარება სპორტის ამ სახეობის განვითარებას და პოპულარიზაციას”,-აცხადებს სპორტისა და ახალგაზრდულ საქმეთა მინისტრი ტარიელ ხეჩიკაშვილი.
ამასთან, სამინისტროს ინფორმაციით, ქართულ ჭიდაობას, სპორტისა და ახალგაზრდობის საქმეთა სამინისტროს ინიციატივით, კულტურული მემკვიდრეობის დაცვის ეროვნულმა სააგენტომ 2014 წელს არამატერიალური კულტურული მემკვიდრეობის ძეგლის სტატუსი მიანიჭა.შემდგომი ეტაპი უკვე საერთაშორისო აღიარებაა და შესაძლებელია, ქართული ჭიდაობა სამომავლოდ იუნესკო-ს მხრიდან დაფასდეს.
“აღსანიშნავია, რომ ბოლო წლებში ქართული ჭიდაობის წლის ყველაზე მნიშვნელოვან ტურნირზე – ფალავნობაზე მონაწილეობას უცხოელი სპორტსმენებიც იღებენ, რაც ქართული ჭიდაობის პოპულარიზაციას უსვამს ხაზს.