რუსთავის მაჟორიტარი დეპუტატის, დარგობრივი ეკონომიკისა და ეკონომიკური პოლიტიკის კომიტეტის თავმჯდომარის პირველი მოადგილის გიორგი ბეგაძის ინიციატივით, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძესთან „რუსთავის აზოტის“ ქარხნის გათავისუფლებულ თანამშრომლებთან შეხვედრა გაიმართა.
350-მდე თანამშრომელი სამუშაო ადგილებიდან დაახლოებით ერთი კვირის წინ გაათავისუფლეს, რასაც საპროტესტო აქციები და გამოსვლები მოყვა. შეხვედრის მიზანს გათავისუფლებული თანამშრომლების მოთხოვნების გაცნობა და მათი დახმარების გზების მოძიება წარმოადგენდა. კომიტეტის თავმჯდომარე საინიციატივო ჯგუფის წევრებს საკითხის საფუძვლიანად შესწავლას და პრობლემის მოგვარებაში მედიაციას დაჰპირდა.
„სოციალური და ეკონომიკური უფლებების დაცვა ჩვენი პრიორიტეტია და ხელისუფლების მხრიდან დიდი ყურადღება ექცევა სოციალური ფონის გაუმჯობესებას. ჩვენთვის მნიშვნელოვანია თვითოეული ადამიანი, რომელიც სამუშაოს დაკარგვის პირასაა და ვცდილობთ, პრობლემები სამართლიანად და დროულად გადავწყვიტოთ“, – აღნიშნა სოფო კილაძემ.
რუსთავის მაჟორიტარი დეპუტატის განცხადებით, მნიშვნელოვანია, რომ პროცესები საფუძვლიანად იქნეს შესწავლილი, რათა ერთი მხრივ, ადამიანები არ დარჩნენ უმუშევრად და ასევე შრომითი ურთიერთობების შეწყვეტის შემთხვევაში არ დაირღვეს ადამიანის უფლებები. „მაშინ, როდესაც ჩვენი გუნდი ქვეყნის სწრაფ ეკონომიკურ განვითარებაზე და ადამიანთა კეთილდღეობაზე ზრუნავს, პასუხისმგებლობა ყველამ უნდა აიღოს და ამ პროცესების ხელის არ შეშლის ვალდებულება გაითავისოს“, – განაცხადა გიორგი ბეგაძემ.
აღნიშნულ საკითხთან დაკავშირებით, კომიტეტში შეხვედრები მომავალშიც გაგრძელდება.