ლევან გოგიჩაიშვილი: საგანგაშოა, როდესაც სასამართლოს დამოუკიდებლობაში ხელს კიევიდან აფათურებენ

„საგანგაშოა, როდესაც სასამართლოს დამოუკიდებლობაში ხელს კიევიდან აფათურებენ“, – ამის შესახებ საპარლამენტო უმრავლესობის წევრმა, ლევან გოგიჩაიშვილმა განაცხადა.
მისი თქმით, გამოძიებამ ყველაფერი უნდა გააკეთოს, რათა საქმე ბოლომდე იქნას გამოძიებული.
“საგანგაშოა, როდესაც ადამიანები ცდილობენ, კიევიდან აფათურონ ხელი სასმართლოს დამოუკიდებლობაში. მნიშვნელოვანია, ამ საკითხზე გადაწყვეტილება იქნას მიღებული იმ მოსამართლეების მიერ, რომელთა მიმართაც კითხვის ნიშნები და ეჭვი არ იქნება, თავიანთი რეპუტაციის გამომდინარე. წავიკითხე განცხადებები და, რა თქმა უნდა, “ქურდს კუდი ეწვის”. ძალიან ცუდია, როდესაც კითხვის ნიშანი დაისმება მოსამართლეების მოსყიდვასთან და კორუფციასთან დაკავშირებით, ამიტომ გამოძიებამ ყველაფერი უნდა გააკეთოს”, – აღნიშნა გოგიჩაიშვილმა.
რამდენიმე დღის წინ, ყოფილი ხელისუფლების წარმომადგენლების, მიხეილ სააკაშვილისა და დავით საყვარელიძის მიმოწერა გავრცელდა, სადაც საუბარი იყო საქართველოს უზენაესი სასამართლოს მოსამართლების მოსყიდვაზე. გამოძიება პროკურატურამ ფაქტზე 14 იანვარს დაიწყო.