სიკეთით განვეწყოთ და გავიმრავლოთ ირგვლივ სიკეთე და სიყვარული. აუცილებლად წამოგვეწევა სადღაც, ოდესღაც, – ამის შესახებ საფრანგეთში საქართველოს ელჩი გოჩა ჯავახიშვილი სოციალურ ქსელში წერს.
“გავაცილე სამშობლოში, ძლივს მონახულებული მეორე, წარმოსახვითი სამშობლოდან. ერთმანეთით ბედნიერებმა პარიზმა და ეთერი მასწავლებელმა კურცხალი გაცვალეს! ქალბატონი ეთერის გაბრწყინებული სახის შემხედვარე დავრწმუნდი, რომ ბედნიერება ხან ისე მარტივი, ისე ცოტა და ისე ახლოს, ერთი ხელის გაწვდენაზეა.
მისი ისტორია უკვე იცით, ისიც იცით, რომ მის შესახებ არაჩვეულებრივი მესხი ჟურნალისტის Tako Peikrishvilii-ის რეპორტაჟის შემდეგ Rustavi 2 • რუსთავი 2 შუადღე • Shuadge ამაღელვებელი სიუჟეტი მოამზადა, რომლის ნახვისთანავე ამეკვიატა აზრი, რომ თავის საქმეზე უზომოდ შეყვარებულ და ამაგდარ ქალბატონს ამ დიდი ხნის ოცნების ასრულებაში უნდა დავხმარებოდი.
ბედნიერების განმარტების უამრავი, ალბათ ინდივიდუალური ვერსიები გვაქვს ყველას. ზოგისთვის ბედნიერება კარგი ამინდია, მზეს რომ მიეფიცხოს ან სულაც სათევზაოდ წავიდეს, ზოგისთვის მატერიალური კეთილდღეობაა და აშ, მაგრამ ვიღაცისთვის სიხარულისა და თვალებში ბედნიერების ნაპერწკლის გამომწვევი წყარო აღმოჩნდე, მგონი ეს ყველასთვის იქნება ბედნიერების განცდა.
ამ ბედნიერების განცდას ვუმადლი ქალბატონი ეთერის გამაბედნიერებელთა მთელ გუნდს:
თაკო ფეიქრიშვილს, რუსთავი 2 -ს გუნდს- ნინისა და სანდროს, ქალბატონი ეთერის რეგიონის მაჟორიტარ დეპუტატს ანტონ ობოლაშვილი / Anton Obolashvili ოცნების ახდენის ფინანსური მხარდაჭერისათვის, ასოციაცია ქართველები საფრანგეთში/Géorgiens en France, ჩემი მხარში დგომისთვის და ქალბატონი ეთერის მასპინძლობაში, მათ რომ იციან, ისეთი გულიანი და ნიჭიერი მონაწილეობისთვის, Promethea Voyages CAUCASUS -შორენა ნინიაშვილს Bateau Mouche სთვის, ორსეს მუზეუმის ანგელოზს Gari Gari გარი საფარიანს, კარნავალესა და სხვა მუნიციპალური მუზეუმების ფერიას Ilona Bergerr -ს, ჩემი საელჩოს არაჩვეულებრივ გუნდს და რაღა თქმა უნდა ქნი ეთერის არაჩვეულებრივ შვილს Paata Chilingarashvili..
ოცნება ახდენილია. ქალბატონი ეთერი კმაყოფილი ბრუნდება და ეს ესაა იმ პირობით დავემშვიდობეთ ერთმანეთს, რომ რის ნახვაც ვერ მოვასწარით, შემდეგი ვიზიტებისთვის მოვახერხოთ.
არასოდესაა გვიან ნატვრისა და ოცნების ახდენა. ქალბატონ ეთერს განგებამ იმ სიკეთის წილ დაუბრუნა ჩვენი მოკრძალებული ყურადღება, რაც მას ოდესმე სხვების მიმართ გამოუჩენია და გაუღია.
სიკეთით განვეწყოთ და გავიმრავლოთ ირგვლივ სიკეთე და სიყვარული. აუცილებლად წამოგვეწევა სადღაც, ოდესღაც. ბოლოს და ბოლოს იქნებ იმ „ ერთ მნიშვნელოვან დღეს“ სწორედ იმის წილ მოგვეზღოს თუ ვინ ვის რამდენი სიხარული მოუტანა და ბედნიერად აგრძნობინა თავი.
სიკეთე და პოზიტივი გავამრავლოთ, ერთმანეთს გადავდოთ. ჟანგბადივით გვჭირდება კარგი ამბები“, – წერს გოჩა ჯავახიშვილი.