საკრებულოში წარმოდგენილი მასალების მიხედვით ჩვენ საფუძველი არ გვქონდა, ეჭვი შეგვეტანა ჩვენი გადაწყვეტილების მიღებისას.
ამის შესახებ თბილისის საკრებულოში დღეს საკრებულოს თავმჯდომარე გიორგი ალიბეგაშვილმა ჟურნალისტებს განუცხადა.
ალიბეგაშვილმა კომენტარი გააკეთა თბილისის საკრებულოს ოპოზიციონერი დეპუტატების განცხადებასთან დაკავშირებით, რომელიც მოსამართლე ნატა ნაზღაიძის ოჯახისთვის 2015 წლის სტიქიით მიყენებული ზარალის ქონებით ანაზღაურებას ეხებოდა.
„საკრებულოში შემოსული მასალებისა და დოკუმენტაციის საფუძველზე, საკრებულომ მიიღო კანონიერი გადაწყვეტილება, იმოქმედა კანონის ფარგლებში. დოკუმენტაცია, რომელიც იყო შემოტანილი, არანაირი ეჭვის საფუძველს არ იძლეოდა. რაც შეეხება ჩვენი კოლეგების წინადადებას, რომ თავიდან იქნეს განხილული, საკრებულო კოლეგიალური ორგანოა. თუ ისინი თვლიან, რომ მათ მიერ მოპოვებული დოკუმენტაცია განსახილველია, ჩვენ აუცილებლად ვიმსჯელებთ ამ საკითხზე და შესაბამის გადაწყვეტილებას მოგახსენებთ“, – განაცხადა გიორგი ალიბეგაშვილმა.
თბილისის ოთხმა ოპოზიციურმა ფრაქციამ, ასევე დამოუკიდებელმა დეპუტატებმა დღეს საკრებულოს მიმართეს 2016 წლის 23 დეკემბრის განკარგულების გაუქმებასთან დაკავშირებით, რომლითაც ნატა ნაზღაიძის ოჯახს სტიქიისაგან მიყენებული ზარალის ერთ მილიონამდე ქონების გადაცემით აუნაზღაურდა.