მოსამართლე ნატა ნაზღაიძის გარშემო განვითარებულ მოვლენებს უმრავლესობის ლიდერი არჩილ თალაკვაძე „ექსკლუზივ ნიუსთან“ აფასებს. შეგახსენებთ, რომ კვირას ჟურნალისტმა ნოდარ მელაძემ მოამზადა სიუჟეტი იმის თაობაზე, თითქოს სტიქიით დაზარალებულთა ფონდიდან, მოსამართლე ნატა ნაზღაიძის ძმამ ერთი მილიონი ჩაურიცხა. გუშინ კი ცნობილი გახდა, რომ ფონდიდან თანხა არა ნატა ნაზღაიძის ძმას, არამედ სტიქიის ზონაში მდებარე ფართის რეალურ მფლობელს გიორგი ჩოხელს ჩაერიცხა.
„ზუსტად ორი დღე დასჭირდა იმის გარკვევას, რომ ეს იყო მოკლე ფეხებიანი ტყუილი. 1. გაირკვა რომ ეს კომპენსაცია მიიღო ნაკვეთის მფლობელმა ჩოხელმა და არა ნაზღაიძის ძმამ, 2. აბსურდია და ბავშვიც კი არ დაიჯერებს იმას რომ ხელისუფლებამ და ბატონმა ბიძინა ივანიშვილმა, სცადა ვინმესთვის ფულის გადახდა სტიქიის ფონდიდან სახელმწიფოს გავლით, მაშინ როდესაც ამ სტიქიას თვითონ შესწირა და ფონდში 17 მილიონი ლარის დონაცია შეიტანა? თუ ვინმესთვის ფულის გადახდა უნდოდა, რაღა ფონდში ჩარიცხავდა? ეს არის აბსურდი რომელსაც მოკლე ჭკუის ადამიანი თუ იტყვის. 3. სინამდვილეში ეს იმიტომ გაკეთდა, რომ ყურადღება გადაეტანათ იმ რეალური შეკითხვებიდან, რომელიც ჩვენ გვაქვს იმ მოსამართლეებთან დაკავშირებით, ვისთანაც ფარული მოლაპარაკებები თავად დაადასტურა ბატონმა ნიკა გვარამიამ. მან თქვა, რომ ეს მონტაჟია, მაგრამ რა მნიშვნელობა აქვს, ის ფარულ მოლაპარაკებას აწარმოებდა ახვლედიანთან. პასუხი უნდა გასცეს საზოგადოებას და პროკურატურას, რატომ ურეკავენ მოსამართლეებს და რა კავშირი აქვთ იმ მოსამართლეებთან, რომლებიც სენსიტიურ საქმეებს განიხილავენ? უმრავლესობის წევრებს რომ დაერეკათ რომელიმე მოსამართლესთან, წარმოგიდგენიათ რა პოლიტიკური პასუხისმგებლობის საკითხი დადგებოდა? ეს არის ზეგავლენის მოხდენის მცდელობა იმ მოსამართლეებზე, ვისაც შეუძლია სამართლებრივი გადაწყვეტილების მიღება.