ოპერატიულ-ტექნიკური სააგენტო მხოლოდ სერვისის განმახორციელებელი ტექნიკური სააგენტო იქნება, რომელიც არაფერს გააკეთებს გარდა იმისა, რომ როცა მოსამართლის ბრძანება მიუვა, განახორციელოს ეკას ფარული მიყურადება, უნდა განახორციელოს მისი ფარული მიყურადება და არა სხვისი, – აღნიშნული განმარტება პარლამენტის თავდაცვისა და უშიშროების და ადამიანის უფლებათა დაცვის კომიტეტების გაერთიანებულ სხდომაზე, იურიდიულ საკითხთა კომიტეტის თავმჯდომარე ეკა ბესელიამ ფარულ საგამოძიებო მოქმედებებთან დაკავშირებული საკანონმდებლო ინიციატივის წარდგენისას გააკეთა.
”თუკი ხდება ისე, რომ მოსამართლის ბრძანება არ სრულდება ან ხდება მანიპულაცია, რაც ასევე არის გასათვლელი რისკი, ასეთ შემთხვევაში, კანონი ხუთი დონის კონტროლს ითვალისწინებს. პირველი, გამოძიების ხელმძღვანელი პროკურორი მიმართავს სასამართლოს, როცა საჭიროა ვინმეს მიმართ ფარული საგამოძიებო მოქმედება და მოსამართლე გასცემს ბრძანებას. ამის შემდეგ მოსამართლის ბრძანება პერსონალურ მონაცემთა დაცვის ინსპექტორთან მიდის. ბრძანების მეორე ასლი მიდის ოპერატიულ-ტექნიკურ სააგენტოში. ორივე ბრძანებას ინსპექტორი ადარებს – ეს არის სპეციალური სისტემა, რომელიც მასთან არის დამონტაჟებული. ხდება ინფორმაციების დადარება და ამის შემდეგ იწყება ფარული საგამოძიებო მოქმედება. იმ შემთხვევაში, თუ პერსონალურ მონაცემთა დაცვის ინსპექტორი ხედავს, რომ პროცესის განხორციელების დროს ადგილი აქვს რაიმე მანიპულაციას, რომ ეკას მაგივრად სოფოს ტელეფონი ჩაირთო, რაზეც სასამართლოს ბრძანება არ არის, ამას სისტემა აჩვენებს და მას აქვს გამორთვის ფუნქცია. მას შეუძლია გამორთოს ისეთი ტექნიკური წუნის შემთხვევაშიც, როცა მოსამართლის განჩინებაში ან პროკურორის დადგენილებაში მონაცემები არასწორად წერია. პროექტით შემოდის პრემიერ-მინისტრის კონტროლის მექანიზმი, რომლის წინაშეც სააგენტოს უფროსი ვალდებულია წარუდგინოს ანგარიში. შემოდის პარლამენტის კონტროლი – ჩვენ პარლამენტის ნდობის ჯგუფს ვაძლევთ სააგენტოზე კონტროლის განხორციელების მანდატს. კონტროლის კუთხით შემოდის სიახლე – ეს არის მესამე გასაღები, რომელიც უზენაეს სასამართლოში ერთ მოსამართლეს ექნება, რომელიც კონტრდაზვერვითი საქმიანობის კონტროლზე იმუშავებს. მასთან იქნება სისტემა, რა სისტემაც აქვს ინსპექტორს და მოსამართლეს, რომელიც კონტრდაზვერვით საქმიანობას გააკონტროლებს და აქვს გამორთვის ფუნქცია. კიდევ ერთი კონტროლია აუდიტის სამსახური, რომელიც აკონტროლებს სააგენტოს ანუ გვაქვს ხუთი დონის კონტროლი – ეს ციფრი ზოგს უყვარს, მე მაინცდამაინც არ მომწონს, მაგრამ კონტროლის სახეობების სიმრავლის თვალსაზრისით კარგია. არ ვიცი, კიდევ რა მაკონტროლებელი შეიძლება ჩავრთოთ”, – განაცხადა ბესელიამ ორი კომიტეტის გაერთიანებულ სხდომაზე.