ჯერჯერობით იმ შეკითხვებზე პასუხი ვერ მოვისმინეთ, თუ რა ფარულ მოლაპარაკებებს აწარმოებდა ბატონი გვარამია სასამართლოს ხელმძღვანელ ახვლედიანთან, – ამის შესახებ უმრავლესობის ლიდერმა არჩილ თალაკვაძემ განაცხადა.
“საკონსტიტუციო სასამართლოს გადაწყვეტილებებზე მიჩნდება შეკითხვები, რამდენად იყო ეს გადაწყვეტილება თავისუფალი პოლიტიკური მოტივაციებისგან, რადგან ჩვენ ვხედავთ მოვლენათა ჯაჭვს, სადაც საჯაროვდება ისეთი ფაქტები, რომლებიც ადასტურებენ კავშირებს ყოფილი ხელისუფლების წარმომადგენლებსა და სასამართლო ხელისუფლების წარმომადგენლებს შორის. ჯერჯერობით იმ შეკითხვებზე პასუხი ვერ მოვისმინეთ, თუ რა ფარულ მოლაპარაკებებს აწარმოებდა ბატონი გვარამია სასამართლოს ხელმძღვანელ ახვლედიანთან. ჯერჯერობით პასუხი არ გაუციათ იმ შეკითხვებზე, ბატონ ქათამაძესა და ბატონ ალავიძეს რა კავშირი ჰქონდათ და ვინ უგზავნიდა ყოფილი ხელსუფლებიდან წერილებს, სადაც შეთავაზებებზე, მუქარასა თუ მადლიერებაზე იყო საუბარი. როდესაც არის ეს ვითარება, ჩვენ ვერ გამოვრიცხავთ, იყო თუ არა საუკეთესო ქვეყნისთვის ის გადაწყვეტილება, რომელიც მიიღო საკონსტიტუციო სასამართლომ. მე ვსვამ ერთადერთ შეკითხვას, თუ რატომ მოხდა იმ პერიოდში რამდენიმე მნიშვნელოვანი გადაწყვეტილების მიღება საკონსტიტუციო სასამართლოს მხრიდან ზედიზედ, მაშინ როდესაც საკონსტიტუციო სასამართლო წლები იხილავდა ბევრად უფრო ნაკლები რაოდენობის საქმეებს.
ფარული საგამოძიებო მოქმედებების შესახებ კანონპროექტით უსაფრთხოება მეტად დაცული იქნება. ახალი მოდელი ეყრდნობა საუკეთესო საერთაშორისო გამოცდილებას. ეს არის მოდელი, რომელიც ქმნის ბალანსს, ეფექტურად დაიცავს, ერთი მხრივ, ადამიანების სიცოცხლეს და უსაფრთხოებას ქვეყანაში. სახელმწიფო ინტერესებისთვის, ეს არის მნიშვნელოვანი, ამ რთულ გეოპოლიტიკურ ვითარებაში, როდესაც რისკები მთელ მსოფლიოში გაზრდილია. ამ პროექტით შემოთავაზებულია სამი მნიშვნელოვანი პრინციპი: პირველი ეს არის ხელისუფლების სამივე შტოს კონტროლი – აღმასრულებელი ხელისუფლება, სასამართლო ხელისუფლება და პარლამენტი, რომელსაც ნდობის ჯგუფის ფარგლებში შესაძლებლობა ექნება გააკონტროლოს ფარული საგამოძიებო მოქმედედებები; მეორე – იყო მოთხოვნა, რომ გარკვეული საგამოძიებო მოქმედებების ფუნქცია ყოფილიყო გატანილი სახელმწიფო უსაფრთხოების სამსახურიდან და დიახ, ახალი მოდელით ის გამოდის სუს-იდან და გადაეცემა ახალ დამოუკიდებელ სისტემას, რომელსაც შექმნის სახელმწიფო. მესამე – ასევე იყო მოთხოვნა, რომ ის ორგანო, რომელსაც გადაეცემოდა ეს ფუნქცია, არ უნდა ჰქონოდა საგამოძიებო ინტერესები და გამოძიების ფუნქცია. ეს მოთხოვნაც არის დაკმაყოფილებული და გადადის ისეთი ორგანოს ხელში, რომელსაც გამოძიება არ ევალება”, – განაცხადა თალაკვაძემ.
