ექსპერტი მამუკა არეშიძე ფარულ მოსმენებთან დაკავშირებულ კანონპროექტს ყველაზე ოპტიმალურ ცვლილებად აფასებს და ამბობს, რომ აღნიშნული პროექტით, ერთი მხრივ მაქსიმალურად შემცირდება ადამიანის უფლებების დარღვევის რისკი და მეორე მხრივ, გაიზრდება ქვეყნის უსაფრთხოების დაცვის სტანდარტი. მისი თქმით, კონტროლის ხუთ დონიანი მექანიზმი დიდ წილად შეზღუდავს ფარული მოსმენების უკანონო განხორციელებას.
„ჩვენს საზოგადოებას დასჩემდა მუდმივი ეჭვიანობა. ამის საფუძველი გვაქვს კიდეც, მაგრამ ხომ არ შეიძლება ყველაფერზე დაუსრულებლად ვიეჭვიანოთ?! მრჩება შთაბეჭდილება, რომ ამ კანონოს გამოყენება ოპოზიციას თავისი პოლიტიკური მიზნებისთვის უნდა.
როდესაც ამ თემაზე ვაგროვებდი ინფორმაციას გადავხედე დასავლეთ ევროპის წამყვანი ქვეყნების გამოცდილებას. უნდა გითხრათ, რომ მაგალითად, ბრიტანეთმა 2016 წელს მიიღო ახალი კანონმდებლობა, რომელიც ჩვენი ოპოზიციის გადასახედით შესაძლოა დრაკონულ კანონად ჩაითვალოს, ვინაიდან მნიშვნელოვნად გაფართოვდა უსაფრთხოების სამსახურების ფუნქციები ფარული მოსმენებისა და მიყურადების მიმართულებით. ბრიტანეთის მთავრობამ ჩათვალა, რომ დღეს მისი მოქალაქეების უსაფრთხოება არის სერიოზული რისკის ქვეშ. აქედან გამომდინარე, საჭირო გახდა ისეთი ნაბიჯების გადადგმა, რომელიც არც დემოკრატიას დააზარალებს და არც უსაფრთხოების სისტემას შეუქმნის პრობლემებს.
საქართველოში ერთი შეხედვით ეს საფრთხეები არ ჩანს, მაგრამ მე როგორც რეგიონალური უსაფთხოების სპეციალისტმა, შემიძლია დარწმუნებით გითხრათ, რომ ეს ხიფათი საკმაოდ სერიოზულია. ვფიქრობ, ისეთი კანონის მიღება, რომელსაც ადამიანის უფლებების მხრივ ხუთდონიანი დაცვის მექანიზმი გააჩნია, ყველაზე ოპტიმალურია. განსაკუთრებით აღსანიშნავია კონტროლის ერთ-ერთი მექანიზმის გადაცემა პარლამენტის ნდობის ჯგუფისთვის, სადაც წარმოდგენილნი არიან ოპოზიციის წარმომადგენლებიც და დარწმუნებული იყავით, რომ თუ რაიმე გადაცდომას ექნება ადგილი ისინი ამას არ დამალავენ.
საერთო ჯამში, დაგეგმილი კონტროლის მექანიზმებით ეს ცვლილებები იძლევა საფუძველს, რომ მაქსიმალრუად შემცირდეს ადამიანის უფლებების დარღვევის რისკი და მეორე მხრივ, გაიზარდოს ქვეყნის უსაფრთხოების დაცვის სტანდარტი.
მოდელი, რომლის შემოღებასაც მოითხოვს არასამათავრობო სექტორი, საუბარი მაქვს დამოუკიდებელი სააგენტოს შექმნაზე, ამის პრეცედენტი ვერცერთ განვითარებულ ქვეყანაში ვერ მოვიძიე. თუ ვინმე მანახებს ასეთ მოდელს, სიამოვნებით გავეცნობი“, – აცხადებს მამუკა არეშიძე.