საქართველოს პრეზიდენტი გიორგი მარგველაშვილი სასულიერო პირის დაკავების საქმესთან დაკავშირებით მთავარი პროკურატურის მიერ გავრცელებული ინფორმაციით შეშფოთებულია.
აღნიშნულთან დაკავშირებით ქვეყნის პირველი პირი განცხადებას ავრცელებს, რომელშიც განმარტავს, რომ პრეზიდენტის ადმინისტრაცია აქტიურ კომუნიკაციაშია პროკურატურასთან.
„შეშფოთებული ვარ მთავარი პროკურატურის მიერ დღეს გავრცელებული ინფორმაციით, რომლის მიხედვითაც იგეგმებოდა საქართველოს მაღალი იერარქიის სასულიერო პირის სიცოცხლის ხელყოფა. ჩვენ აქტიურ კომუნიკაციაში ვართ პროკურატურასთან, ვაკვირდებით გამოძიების პროცესს, სახელმწიფოს ინტერესებიდან გამომდინარე ველოდებით გამოძიების დროულად დასრულებას, რომელიც გასცემს პასუხს კითხვებს, როგორც დაგეგმილი დანაშაულის შესაძლო მონაწილეების, ასევე შემკვეთების თაობაზე“, – ნათქვამია პრეზიდენტის განცხადებაში.