ალტერნატიული ცენტრის შექმნაზე „ლელოს“ განცხადება არის ამბიციური, რაც შეიძლება, მარკეტინგულ გათვლას მივაწეროთ, ცდილობენ საზოგადოების იმ გარკვეული სეგმენტის გულის მონადირებას, რომელსაც ჩამოყალიბებული პრეფერენციები არ აქვს, – ამის შესახებ საქართველოს პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა.
ამასთან, მისივე თქმით, „ლელო“ არავითარი ახალი სახეებით არ არის დაკომპლექტებული და ზოგადად, არც ოპოზიციაში მოქმედი არცერთი პოლიტიკური გუნდი.
„ეს იგივე სახეებია, რომლებიც „ნაციონალურ მოძრაობასთან“ არის დაკავშირებული და კარგად გამოწრთობილი არიან ქართულ პოლიტიკაში. ამიტომ, რეალურად მარკეტინგული სვლა, რომ რაღაც პოზიტიური სიტყვებით შეამკონ და შეფუთონ, ლიტონი სიტყვებია, რომელსაც არავითარი შინაარსი არ აქვს.
რაც შეეხება ახალი ალტერნატიული ცენტრის შექმნასთან დაკავშირებულ განცხადებებს, აქაც ყველაფერი ნათელია. ეს არის არა ამბიციური განცხადება, არამედ შეიძლება, უფრო მეტად ვინმეს სურვილი. ესეც შეიძლება, მარკეტინგულ გათვლას მივაწეროთ. როდესაც ასეთ განცხადებას აკეთებენ, თვლიან, რომ არსებობს გარკვეული სეგმენტი საზოგადოებაში, რომელსაც ჩამოყალიბებული პოლიტიკური პრეფერენციები არ აქვს და ცდილობენ, მათი გულის მონადირებას. ქართველი ამომრჩეველი საკმაოდ გამობრძმედილია საიმისოდ, რომ მისი არჩევანი და პოზიცია ასეთ ლიტონ განცხადებებზე დამოკიდებული არ იყოს“, – განაცხადა მიხეილ სარჯველაძემ.