გვაქვს პოზიტივი, რომელზეც ახლა ვერ ვისაუბრებ, დავით გარეჯის საკითხი აუცილებლად გადაწყდება ისე, როგორც სტრატეგიულ პარტნიორებსა და მეგობრებს შეეფერებათ, – ამის შესახებ აზერბაიჯანში საქართველოს ელჩმა, ზურაბ პატარაძემ განაცხადა.
როგორ ზურაბ პატარაძემ აღნიშნა, დღეს, როგორც არასდროს, ქვეყნებს შორის პოლიტიკურ ჭრილში მაღალი დონის დიალოგი არსებობს.
„დავით გარეჯთან დაკავშირებით მინდა, გითხრათ, რომ ეს არის ცოცხალი პროცესი. თქვენ იცით, ამასთან დაკავშირებით ასევე მუშაობენ კომისიები. ჩატარდა სხდომა პანდემიამდე პერიოდში. ეს მუშაობა აუცილებლად გაგრძელდება. მინდა, დაგარწმუნოთ, რომ ეს საკითხი აუცილებლად გადაწყდება იმგვარად, როგორც შეეფერება ორ მეგობარ, სტრატეგიულ პარტნიორ ქვეყანას. აუცილებლად იქნება შედეგი. ძალიან გთხოვთ, ნუ დავასწრებთ მოვლენებს. გვაქვს პოზიტივი, რომელზეც ახლა ვერ ვისაუბრებ, ეს საკითხი აუცილებლად გადაწყდება ისე, როგორც შეეფერებათ სტრატეგიულ პარტნიორებსა და მეგობრებს. ნუ დავასწრებთ მოვლენებს. დღეს საქართველოსა და აზერბაიჯანის ლიდერებს შორის არსებობს ძალიან კარგი კომუნიკაცია. თქვენ მომსწრე ხართ, შარშან, შარშანწინ, პრეზიდენტი ალიევი იმყოფებოდა ოფიციალური ვიზიტით საქართველოში, ასევე საქართველოს პრემიერ-მინისტრი იმყოფებოდა აზერბაიჯანში წელს ორჯერ. დაგეგმილია მთელი რიგი ღონისძიებები, მათ შორის სამთავრობათაშორისი კომისიის ჩატარება ქალაქ ბაქოში გაზაფხულზე. ვფიქრობ, ამ ფორმატებში ჩვენ გვექნება საშუალება, მივიღოთ კონკრეტული შედეგები“, – განაცხადა ზურაბ პატარაძემ.