დამისახელეთ ერთი პრეცედენტი ჩვენი ქვეყნის ისტორიაში, რომ ადამიანს ქონება დაეგროვებინოს საზღვარგარეთ, შემდეგ თავისი ნებით ჩამოეტანოს და დაეხარჯა 3 მლრდ დოლარი ქველმოქმედებაში, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებთან საუბრისას განაცხადა.
როგორც ირაკლი ღარიბაშვილმა აღნიშნა, ბიძინა ივანიშვილმა ბოლო 20 წლის განმავლობაში 3 მლრდ დოლარი დახარჯა ქველმოქმედებაში.
ამასთან ღარიბაშვილმა ტელეკომპანია „ფორმულას“ ჟურნალისტს მიმართა: „თქვენი ტელევიზია ეკუთვნის ოლიგარქ კეზერაშვილს. ოლიგარქის განმარტება თქვენ შეგიძლიათ ძალიან მარტივად მოიპოვოთ ინტერნეტში, არის ადამიანი, რომელიც სახელმწიფოს რესურსებზე გამდიდრდა, ამას იყენებს და იყენებს ხალხის რესურსს, ქვეყნის რესურსს. ბიძინა ივანიშვილის ქველმოქმედება მინდა, შეგახსენოთ, დამისახელეთ ერთი პრეცედენტი ჩვენი ქვეყნის ისტორიაში, რომ ადამიანს ქონება დაეგროვებინოს საზღვარგარეთ, შემდეგ თავისი ნებით ჩამოეტანოს და დაეხარჯა, დახარჯა 3 მლრდ დოლარი ქველმოქმედებაში, ბოლო 20 წლის განმავლობაში. სად იყო მაშინ პოლიტიკაში ან სად იყო გაცხადებული მიზნები, რომ პოლიტიკაში აპირებდა შემოსვლას?! ფაქტი არის შემდეგი, რომ ეს არის დეზინფორმაციული პროპაგანდა. აი, ამ სიცრუეს, ამ დეზინფორმაციას და ყველა აი ამ ცრუ პროპაგანდას, ყველაფერს ბოლო მოეღება და კიდევ ერთხელ, მინდა მოგილოცოთ ახალი წელი, გისურვოთ მშვიდობა, სტაბილურობა და გამარჯვება“, – განაცხადა პრემიერ-მინისტრმა.