თბილისის მერმა, კახა კალაძემ პირველი რესპუბლიკის მოედანზე, საახალწლო გალაკონცერტზე შეკრებილებს სიტყვით მიმართა და მოქალაქეებს ახალი 2024 წელი მიულოცა.
„გილოცავთ 2024 წლის შემობრძანებას, მინდა, მივულოცო ემიგრაციაში მყოფ ჩვენს თანამემამულეებს. დღეს, ამ ჯადოსნურ, საოცარ ღამეს მთელ მსოფლიოში ერთიანდებიან ერთი სურვილის გარშემო, რომ მშვიდობა იყოს ჩვენს ქვეყნებში და კეთილდღეობა ჩვენს ოჯახებში. სულ რამდენიმე წუთის წინ გავაცილეთ 2023 წელი წელი. მინდა, მადლობა გადავუხადო 2023 წელს იმ წარმატებისთვის, რომელიც ჩვენს ქვეყანას და ჩვენს ულამაზეს დედაქალაქს შეხვდა ბოლო ერთი წლის განმავლობაში. რა თქმა უნდა, ყველა წარმატების უკან დგას უამრავი ადამიანის შრომა. მინდა, ვისარგებლო შემთხვევით და მადლობა გადავუხადო ყველას, ვინც თავიანთი შრომით, თავიანთი შემოქმედებით, მიღწეული სპორტული წარმატებებით, თუნდაც ყოველდღიური პროფესიონალური და კეთილსინდისიერი საქმიანობით ჩვენი ქვეყანა წინ წაწია, გაალამაზა ჩვენი დედაქალაქი. არაფერია იმაზე დიდი ბედნიერება, რომ შენი საქმიანობით, შენი ყოველდღიურად გადადგმული ნაბიჯებით აბედნიერებდე ხალხს და ქმნიდე უკეთეს გარემოს. მინდა, დღეს ასევე მივულოცო და მადლობა გადავუხადო ყველა იმ ადამიანს, ვინც თავის პროფესიულ საქმიანობას ახორციელებს, ემსახურებიან ამ ქვეყანას და ამ ქვეყანაში მცხოვრებ ადამიანებს“, – აღნიშნა კახა კალაძემ.
ამასთან, კალაძემ მოქალაქეებს კიდევ ერთხელ მიულოცა საქართველოსთვის ევროკავშირის წევრი ქვეყნის კანდიდატის სტატუსის მინიჭება.
„ჩვენმა ქვეყანამ მიიღო დამსახურებული ევროკავშირის კანდიდატი ქვეყნის სტატუსი და კიდევ ერთხელ გილოცავთ, ვულოცავ სრულიად საქართველოს. ეს არის, რა თქმა უნდა, ჩვენი ქვეყნის მოქალაქეების დამსახურება და იმ გუნდის დამსახურება, რომელსაც „ქართული ოცნება – დემოკრატიული საქართველო“ ჰქვია. მინდა, ასევე მივულოცო ჩვენს თანამემამულეებს, რომლებიც ემიგრაციაში იმყოფებიან და ვუსურვო მალე დაბრუნება შინ უკვე ევროპაში. გილოცავთ, პირველ რიგში, მინდა, ყველას გისურვოთ ჯანმრთელობა, რაც ყველაზე ძვირფასი, მნიშვნელოვანია, დღეგრძელობა, სიხარული, ბედნიერება არ მოგკლებოდეთ თქვენს ოჯახებთან ერთად, ღმერთი იყოს ჩვენი ქვეყნის და თითოეული ამ ქვეყანაში მცხოვრები ადამიანის მფარველი. 2024 წელი აუცილებლად იქნება კიდევ უფრო მეტი გამარჯვების და სიხარულის მომტანი ჩვენი ქვეყნისთვის და ულამაზესი დედაქალაქისთვის. დღეს ძალიან სასიამოვნო საღამო გელოდებათ, დარწმუნებული ვარ, ისიამოვნებთ. გილოცავთ კიდევ ერთხელ“, – განაცხადა კახა კალაძემ.