პოლონეთის პოლიციამ უფლებამოსილების ბოროტად გამოყენებისთვის მსჯავრდებული ორი პოლიტიკოსი დააკავა, რომლებიც რამდენიმე საათის განმავლობაში პოლონეთის პრეზიდენტის სასახლეს აფარებდნენ თავს. ინფორმაციას ამის შესახებ ამერიკული გამოცემა The Washington Post-ი ავრცელებს.
როგორც The Washington Post-ი აღნიშნავს, განვითარებული მოვლენები ახალ და წინა მთავრობებს შორის დაპირისპირების დრამატულ ესკალაციას წარმოადგენს.
პოლონეთის პრეზიდენტმა, ანდჟეი დუდამ ყოფილი მმართველი პარტიის წევრები პრეზიდენტის სასახლეში მიიღო, როდესაც პოლიცია მათ სახლებში მივიდა მათ დასაკავებლად.
პოლონური მედიის ცნობით, პოლიტიკოსები პრეზიდენტის სასახლეში დააკავეს. ვარშავას პოლიციას არ უსაუბრია დეტალებზე და მხოლოდ ის აღნიშნა, რომ დაკავება სასამართლოს დადგენილების შესაბამისად განხორციელდა.
ანდჟეი დუდა მჭიდროდ დაახლოებულია “კანონისა და სამართლიანობის პარტიასთან” (PiS) და მკაფიოდ აცხადებს, რომ შეეწინააღმდეგება დონალდ ტუსკის მთავრობის დღის წესრიგს.
პოლონეთის პრემიერ-მინისტრმა, დონალდ ტუსკმა პრეზიდენტი დაადანაშაულა იმაში, რომ ის ყოფილი მმართველი პარტიის ქმედებებს ეთანხმება, რათა შექმნას ქაოსი და არასტაბილურობა და დასძინა, რომ დუდამ “უნდა შეწყვიტოს ეს სპექტაკლი, რომელიც ძალიან სახიფათო სიტუაციამდე მიგვიყვანს”.
პრემიერ-მინისტრის თქმით, ძებნილებისთვის თავშესაფრის მიცემით პრეზიდენტი ხელს უშლის მართლმსაჯულების აღსრულებას.
საუბარია შინაგან საქმეთა ყოფილ მინისტრ მარიუშ კამინსკისა და მის ყოფილი მოადგილე მაცეი ვონსიკზე.
კამინსკი და ვონსიკი გაასამართლეს უფლებამოსილების ბოროტად გამოყენების ფაქტზე, რაც 2007 წელს განხორციელებულ ქმედებებს ეხება. მათ გასული წლის დეკემბერში ორი წლით თავისუფლების აღკვეთა მიუსაჯეს. ისინი ამტკიცებენ, რომ უდანაშაულოები არიან. კამინსკი და ვონსიკი მოქმედი დეპუტატები არიან “კანონისა და სამართლიანობის პარტიიდან”.
სასამართლომ ორშაბათს გასცა დადგენილება მათი დაკავებისა და ციხეში გადაყვანის შესახებ.