ცოლის მკვლელობაში ბრალდებულს აღკვეთის ღონისძიების სახით პატიმრობა შეეფარდა. სასამართლომ სრულად გაითვალისწინა პროკურატურის შუამდგომლობა და გიორგი კავლელაშვილი პატიმრობაში დატოვა. სხდომა ბრალდებულის ჯანმრთელობის მდგომარეობიდან გამომდინარე „ჯეო ჰოსპიტალში“ ჩატარდა.
რაც შეეხება ბრალდებულის ჯანმრთელობის მდგომარეობას, პაციენტი უკვე კონტაქტურია და ამ დრომდე კლინიკაში ექიმების დაკვირვების ქვეშ რჩება. როგორც კი მისი მდგომარეობა გაუმჯობესდება, სამართალდამცველები მას პენიტენციურ დაწესებულებაში გადაიყვანენ.
შინაგან საქმეთა სამინისტროს ცნობით, მკვლელობა 9 იანვარს, თბილისში მოხდა. ბრალდებულმა მეუღლეს დანით, სხეულის სხვადასხვა არეში მრავლობითი ჭრილობები მიაყენა. დაზარალებული მიღებული დაზიანებების შედეგად საავადმყოფოში დაიღუპა. ამის შემდეგ ბრალდებულმა დანით გულ-მკერდის არეში ჭრილობები თავადაც მიიყენა.
სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 11 პრიმა 109-ე მუხლის „კ“ ქვეპუნქტებით (განზრახ მკვლელობა, ჩადენილი ოჯახის წევრის მიმართ) წარედგინა, რაც სასჯელის სახედ და ზომად 16-დან 20-წლამდე ან უვადო თავისუფლების აღკვეთას ითვალისწინებს.