მოსკოვში 76 წლის ასაკში გარდაიცვალა ცნობილი რუსი პოეტი და ესეისტი, ლევ რუბინშტეინი – იუწყება მისი ოჯახი 14 იანვარს.
მოსკოვის კონცეპტუალიზმის სკოლის დამაარსებლად მიჩნეული რუბინშტეინი საავადმყოფოში იყო მას მერე, რაც მას 8 იანვარს მანქანა დაეჯახა. პოეტმა მიიღო მრავალი ტრავმა, მას გაუკეთდა ოპერაცია და იმყოფებოდა მედიკამენტებით გამოწვეული ძილის მდგომარეობაში.
ავარიაში მონაწილე მანქანის 63 წლის მძღოლის მიმართ აღძრულია სისხლის სამართლის საქმე.
რუბინშტეინი 1970-იანი წლებიდან რუსეთის ერთ-ერთი ყველაზე ცნობილი პოეტი იყო. მას მიაწერენ პოეზიის საკუთარი ფორმის შექმნას, სიტყვიერების, ვიზუალური ხელოვნების და პერფორმანსის შერწყმით. მისი ტექსტები 1970-იანი წლებიდან ქვეყნდებოდა საბჭოთა “სამიზდატში” და საზღვარგარეთ.
რუბინშტეინი ასევე იყო აქტიური საზოგადოებრივი მოღვაწე. ის გამოდიოდა ჩეჩნეთის ომის წინააღმდეგ, მხარს უჭერდა ჯგუფს Pussy Riot. 2022 წელს რუბინშტეინმა ხელი მოაწერა ღია წერილს, რომელშიც დაგმობილი იყო რუსეთის მხრიდან უკრაინაში სრულმასშტაბიანი შეჭრა.