ავსტრალიის თავდაცვის სამინისტრომ დაიწყო 2023 წლის სექტემბერში ჩამოწერილი MRH-90 Taipan ტიპის სამხედრო ვერტმფრენების განადგურება, მიუხედავად კიევის თხოვნისა, უკრაინისთვის მათი გადაცემის შესახებ.
ამის შესახებ სამაუწყებლო კორპორაცია ABC იტყობინება.
გამოცემის ცნობით, ავსტრალიის თავდაცვის სამინისტრომ 45 ავარიული MRH-90 Taipan ტიპის ვერტმფრენის დემონტაჟი უკვე დაასრულა. „იმის გამო, რომ „ტაიპანის“ კომპონენტებით არავინ დაინტერესებულა, სამინისტრომ, ეკოლოგიურად სუფთა და ეკონომიკურად ეფექტური გზით, მათი უტილიზაცია დაიწყო“, – აცხადებს ABC.
მისივე ცნობით, ამ გადაწყვეტილებამ პროუკრაინელი აქტივისტების უკმაყოფილება გამოიწვია, რომლებიც ავსტრალიის ხელისუფლებისგან „ტაიპანების“ უკრაინისთვის გადაცემას ითხოვდნენ.
„ავსტრალიის მთავრობას, რატომღაც, ის უფრო სურს, რომ ჩვენ ყველამ გადავიხადოთ ავსტრალიის მიწაზე ვერტმფრენების დემონტაჟისა და უტილიზაციის საფასური, ვიდრე ის, რომ ჩამოწერილი ვერტმფრენები გადასცეს მეგობარ ქვეყანას, რომელსაც ისინი სჭირდება“, – ციტირებს ABC აქტივისტების ლიდერის, ანტონ ბოგდანოვიჩის განცხადებას.
უკრაინის ელჩმა ავსტრალიაში, ვასილი მიროშნიჩენკომ იმედი გამოთქვა, რომ ჩამოწერილი ვერტმფრენების მიღების შესაძლებლობა „ჯერ კიდევ არსებობს“, თუმცა, მათი გადაცემის მოთხოვნაზე პასუხი უკრაინას ჯერ არ მიუღია.
ავსტრალიამ თავისი გადაწყვეტილება MRH-90 Taipan ტიპის ვერტმფრენების ექსპლუატაციის ვადაზე ადრე შეწყვეტის შესახებ 2023 წლის სექტემბერში, მას შემდეგ გამოაცხადა, რაც უბედური შემთხვევის შედეგად, ოთხი სამხედრო მოსამსახურე დაიღუპა. გასული წლის დეკემბერში, კიევმა ოფიციალურად სთხოვა კანბერას, რომ ჩამოწერილი 45-ვე ვერტმფრენი მისთვის გადაეცა.
მიმდინარე წლის იანვარში, ავსტრალიის თავდაცვის სამინისტრომ განაცხადა, რომ ყველა ვერტმფრენი უკვე დაშლილი იყო. უწყებამ ასევე აღნიშნა, რომ ავსტრალიის მიერ კიევისთვის გაწეული ჯამური დახმარება 910 მილიონ ავსტრალიურ დოლარს (დაახლოებით 610 მილიონი აშშ დოლარი) აღემატება.