ავსტრიელი იოზეფ ფრითცლი, რომელიც 24 წლის განმავლობაში სარდაფში გამოკეტილ საკუთარ ქალიშვილს აუპატიურებდა, შესაძლოა უახლოეს დროში ციხიდან გამოვიდეს. ამის შესახებ BBC წერს.
გამოცემის ინფორმაციით, 2009 წელს ფრითცლს სამუდამო პატიმრობა მიუსაჯეს განსაკუთრებული რეჟიმის ციხეში. თუმცა ახლა 88 წლის კაცს, შესაძლოა სასჯელი შეუმსუბუქონ, რადგან ექიმებმა დაადგინეს, რომ ფრითცლს დემენცია აქვს და ის საზოგადოებისთვის საფრთხეს აღარ წარმოადგენს.
ავსტრიის კანონმდებლობის მიხედვით, სამუდამო პატიმრობა მისჯილ დამნაშავეებს, რომლებმაც ციხეში 15 წელი გაატარეს, პირობითი გათავისუფლების შესახებ მოთხოვნის გაკეთება შეუძლიათ. ექსპერტების შეფასებით, ფრითცლის შემთხვევაში საუბარი შეიძლება იყოს როგორც სხვა დაწესებულებაში გადაყვანაზე, ასევე ფორმალურ გათავისუფლებაზე. არ არის გამორიცხული, სასამართლომ მისი მოხუცთა პანსიონში გადაყვანის ნებართვა გასცეს.
2022 წელს, სასამართლომ უკვე დაადგინა, რომ ფრითცლი საზოგადოებისთვის საფრთხეს არ წარმოადგენს და მისი ჩვეულებრივ ციხეში გადაყვანა შეიძლება, თუმცა, უმაღლესი ინსტანციის სასამართლომ ეს გადაწყვეტილება დაბლოკა.
ამშტეტენის მკვიდრი ფრითცლი 2008 წელს დააკავეს, მას შემდეგ, რაც გაირკვა, რომ მას თავისი ქალიშვილი – ელიზაბეტი 24 წლის განმავლობაში სარდაფში ჰყავდა გამოკეტილი. ამ დროის განმავლობაში ქალმა მამისგან 7 ბავშვი გააჩინა. 3 მათგანი დედასთან ერთად სარდაფში რჩებოდა, ერთი ბავშვი მოკვდა, დანარჩენებს კი ფრითცლი თავის ცოლთან ერთად ზრდიდა. მან მეუღლეს აუხსნა, რომ ბავშვები მათმა „გაქცეულმა“ ქალიშვილმა მიუგდო. გამოძიებამ დაადგინა, რომ როზმარი ფრითცლმა არ იცოდა, რომ მისი ქალიშვილი, რომელიც დაკარგულად ითვლებოდა, და შვილიშვილები სარდაფში იმყოფებოდნენ.
ყველაფერი მაშინ გაირკვა, როდესაც სარდაფში მცხოვრები ელიზაბეტის ქალიშვილი მძიმედ გახდა ავად და ფრითცლი იძულებული იყო ექიმებისთვის მიემართა. სასამართლოზე კაცმა ბრალი აღიარა და განაცხადა, რომ სასჯელის გასაჩივრებას არ აპირებს.
ელიზაბეტმა და მისმა შვილებმა სახელები და გვარები შეიცვალეს. უცნობია სად და როგორ ცხოვრობენ ისინი ახლა.