გლობალური ბიზნეს საზოგადოებისთვის მომდევნო ორ წელში შეშფოთების მთავარი საგანი არ არის კონფლიქტები და კლიმატის ცვლილება – ეს არის დეზინფორმაცია. ამას კი მოჰყვება ჩვენს საზოგადოებაში არსებული პოლარიზაცია. ეს რისკები საკმაოდ სერიოზულია, რადგან ისინი გლობალური გამოწვევის გამკლავებასთან დაკავშირებით ჩვენს შესაძლებლობებს ზღუდავს. სწორედ ამიტომ, დავოსის წლევანდელი თემატიკა, ნდობის აღდგენა უკიდურესად მნიშვნელოვანია, – ამის შესახებ ევროკომისიის პრეზიდენტმა, ურსულა ფონ დერ ლაიენმა დავოსის მსოფლიო ეკონომიკურ ფორუმზე განაცხადა.
მან აღნიშნა, რომ ახლა კონფლიქტებისა და პოლარიზაციის დრო არ არის, ახლა ნდობის აღდგენის დროა.
„ყოველთვის იქნება მცდელობა, არჩეული გზიდან გადაგვიყვანონ, მაგალითად, მცდარი ინფორმაციით. ეს კარგად ჩანს უკრაინის საკითხთან დაკავშირებით. ნება მომეცით, მოგაწოდოთ რეალური ინფორმაცია: რუსეთი მარცხდება სტრატეგიულ მიზნებში. პირველ რიგში, სამხედრო თვალსაზრისით. არ უნდა დაგვავიწყდეს, როდესაც რუსეთი თავს დაესხა უკრაინას, ბევრი ფიქრობდა, რომ კიევი რამდენიმე დღეში დაეცემოდა, მთელი ქვეყანა კი – რამდენიმე კვირაში. ეს ასე არ მოხდა. ამის ნაცვლად, რუსეთმა დაკარგა თავისი სამხედრო შესაძლებლობების თითქმის ნახევარი. უკრაინამ რუსეთი განდევნა დაკავებული ტერიტორიების ნახევრიდან; უკრაინამ უკან დახია რუსეთის შავი ზღვის ფლოტი და გახსნა სასიცოცხლოდ მნიშვნელოვანი კორიდორი, რომ მსოფლიოს მარცვლეული მიეღო; და უკრაინამ განამყარა საკუთარი დამოუკიდებლობა და თავისუფლება. რუსეთი მარცხს ეკონომიკურადაც განიცდის. სანქციებმა რუსეთის ეკონომიკა თანამედროვე ტექნოლოგიებსა და ინოვაციებისგან დააშორა. რუსეთი ახლა ჩინეთზეა დამოკიდებული.
დაბოლოს, რუსეთი დიპლომატიურადაც მარცხდება. ფინეთი ნატოს შეუერთდა, ამ გზას მალე შვედეთიც გაიმეორებს, უკრაინა კი ევროინტეგრაციის გზაზე ასე ახლოს არასდროს ყოფილა. ეს ყველაფერი იმის მანიშნებელია, რომ ამ ომში უკრაინას გამარჯვება შეუძლია, თუმცა უკრაინას სჭირდება დაფინანსება, მათ შეიარაღება სჭირდებათ. მათ სჭირდებათ შესაძლებლობა, რათა რუსეთის მომავალი თავდასხმები მოიგერიონ. მათ ასევე სჭირდებათ იმედი. უნდა იცოდნენ, რომ ტანჯვის შემდეგ საკუთარი შვილებისთვის უკეთეს მომავალს შექმნიან. უკრაინის უკეთესი მომავალი კი ევროპაა“, – განაცხადა ურსულა ფონ დერ ლაიენმა.
ირაკლი ღარიბაშვილი დავოსის მსოფლიო ეკონომიკურ ფორუმში მიიღებს მონაწილეობს. დაგეგმილია საქართველოს მთავრობის მეთაურის სიტყვით გამოსვლა მრგვალი მაგიდის დისკუსიებზე. ასევე ვიზიტის ფარგლებში პრემიერ-მინისტრი ორმხრივ შეხვედრებსაც გამართავს.
დავოსში შეკრებილი მსოფლიო ლიდერებიდან ერთ-ერთი პირველი გამომსვლელი იყო ჩინეთის პრემიერი, რომელმაც მსოფლიოს მიმართ ღიაობა საჯაროდ დაადასტურა.