უნგრეთის პრემიერ-მინისტრმა, ვიქტორ ორბანმა განაცხადა, რომ ევროკავშირმა უნდა დაეხმაროს უკრაინას, მაგრამ არა ევროკავშირის ბიუჯეტიდან რესურსების გადანაწილებით. ინფორმაციას ამის შესახებ სააგენტო Reuters-ი ავრცელებს.
“თუ გვსურს დავეხმაროთ უკრაინას, რაც მე ვფიქრობ, რომ ჩვენ უნდა გავაკეთოთ, ეს ისე უნდა გავაკეთოთ, რომ ზიანი არ მივაყენოთ ევროკავშირის ბიუჯეტს”, – აღნიშნა უნგრეთის პრემიერ-მინისტრმა.
“მაგრამ 50 მილიარდი ევროს გამოყოფა ევროკავშირის ბიუჯეტიდან ოთხი წლის წინსწრებით არის ევროკავშირის სუვერენიტეტისა და ეროვნული ინტერესების დარღვევა. ჩვენ არც კი ვიცით, რა მოხდება სამ თვეში”, – განაცხადა ვიქტორ ორბანმა.
მისი თქმით, უკრაინის ფინანსური დახმარება ევროკავშირის ბიუჯეტისგან განცალკევებული უნდა იყოს, ხოლო უნგრეთის წინადადება ასეთი მექანიზმის შექმნის შესახებ ეფუძნება მთლიანი ეროვნული შემოსავლის საფუძველზე დახმარების გამოყოფას.