“ბორჯღალოსნები” გერმანიას დღეს რუსთავში შეერკინებიან

რუსთავის სარაგბო სტადიონზე რაგბი ევროპის ჩემპიონატის II ტურში დღეს საქართველოს ეროვნული ნაკრები გერმანიას უმასპინძლებს. შეგახსენებთ, რომ საწყის რაუნდში “ბორჯღალოსნებმა” ბელგიაში მოიგეს, გერმანელებმა კი რუმინეთთან სენსაციური გამარჯვება იზეიმეს. დღეს, მატჩისწინა პრესკონფერენცია შედგა, რომელსაც საქართველოს ნაკრების თავკაც მილტონ ჰეიგის გარდა, გუნდის კაპიტანი მერაბ შარიქაძეც ესწრებოდა.
მილტონ ჰეიგი: “შემიძლია ვთქვა, რომ გერმანიასთან მატჩისთვის სრული სერიოზულობით ვემზადებით და მეტოქის შეუფასებლობაზე საუბარიც კი არაა. ბიჭებმა კარგად იციან, მომავალ მატჩში რა ევალებათ.
ბელგიაში გამართულ შეხვედრაში კორექტივები ამინდმაც შეიტანა და ამას ნამდვილად ვერაფერს მოვუხერხებდით. მინდორი ტალახის გროვად იყო ქცეული, თოვდა და ასეთ პირობებში სანახაობრივი რაგბის ჩვენება ძალიან ძნელი იყო. ახლა, სულ სხვა პირობებია, მეტოქეც სხვაა და თამაშიც განსხვავებული იქნება.
გერმანიას ნამდვილად ხელშესახები პროგრესი აქვს. ეს გუნდი რომ წინ მიიწევს, ჯერ კიდევ გასული წლის შემოდგომის ტესტებზე გამოჩნდა, როდესაც ისინი ურუგვაისა და ბრაზილიას მაგრად დაუხვდნენ, რუმინეთთან გამარჯვება კი, თავისთავად ბევრ რამეზე მეტყველებს”.