ყოფილი კონსერვატორი დეპუტატი, კრისტიონას ბარტოშევიჩიუსი, რომელსაც არასრულწლოვანთა მიმართ განხორციელებულ სექსუალურ დანაშაულებში ედება ბრალი, ოთხშაბათს, 17 იანვარს, პანევეჟისის (ჩრდილოეთ ლიეტუვა) საოლქო სასამართლოში დაიკითხა.
მისი სავარაუდო მსხვერპლის მშობლები მომავალ სასამართლო სხდომაზე გამოიკითხებიან, რომელიც 24 იანვარს არის ჩანიშნული.
„სასამართლო დაკითხავს რვა კანონიერ წარმომადგენელს, ანუ დაზარალებული ბავშვების მშობლებს და ოთხ მოწმეს, რომლებიც არასრულწლოვანი მოწმეების მშობლები არიან. ეს ის ბავშვები არიან, რომლებიც წინასწარი გამოძიების დროს დაკითხეს და ამის შემდეგ, ისინი თავის მშობლებს რაღაც ამბებს მოუყვნენ. ამიტომ, ახლა ეს მშობლებიც დაიკითხებიან“, – განუცხადა ჟურნალისტებს სასამართლოს პრეს-სპიკერმა, ჟოლიტა გუდელიენემ ოთხშაბათს გამართული სასამართლო მოსმენის შემდეგ.
ოლეგას სიბკოვასმა, რომელიც ბარტოშევიჩიუსს იცავს, დაადასტურა, რომ მისი დაცვის ქვეშ მყოფის დაკითხვა უკვე დასრულებულია. ადვოკატის თქმით, ბარტოშევიჩიუსი ამტკიცებს, რომ მის წინააღმდეგ წაყენებულ ყველა ბრალდებაში ის უდანაშაულოა.
ბარტოშევიჩიუსს ბრალად ედება 10 დანაშაული, მათ შორის: ორი დანაშაული გამოიხატება არასრულწლოვანთა მიმართ სექსუალურ ძალადობაში, ოთხი დანაშაული – 16 წლამდე პირის მიმართ განხორციელებულ გარყვნილ ქმედებაში და ოთხი დანაშაული – სხეულის მსუბუქად დაზიანებაში.
სექსუალური ძალადობისთვის მას სამიდან 15 წლამდე თავისუფლების აღკვეთა ემუქრება, 16 წლამდე პირთა მიმართ ჩადენილი გარყვნილი ქმედებებისთვის, – ხუთ წლამდე პატიმრობა, ხოლო სხეულის მსუბუქად დაზიანებისთვის უფრო მსუბუქი სასჯელია გათვალისწინებული.
სავარაუდო დანაშაულები იმ პერიოდშია ჩადენილი, როდესაც ბარტოშევიჩიუსი პარლამენტის წევრი იყო. 2020 წელს ის დეპუტატად კონსერვატიული პარტიის „სამშობლო კავშირი – ლიეტუვას ქრისტიან-დემოკრატების“ (TS-LHD) სიით აირჩიეს, ერთი წლის წინ კი მან ეს თანამდებობა დატოვა.
რამდენიმე ხნის წინ Delfi.lt იტყობინებოდა, რომ პოლიტიკოსის სავარაუდო მსხვერპლნი ვილნიუსის ბიჭებისა და ახალგაზრდების სამუსიკო გუნდის, „Ąžuoliukas“-ის წევრები არიან.
საქმეზე წინასწარი გამოძიება 2022 წლის ნოემბერში დაიწყო და ბარტოშევიჩიუსს ბრალი ოფიციალურად გასული წლის თებერვალში წაუყენეს.
დეპუტატის თანამდებობა მან 2023 წლის იანვრის ბოლოს დატოვა.