მნიშვნელოვანია როგორც პოლიტიკური, ასევე ეკონომიკური ურთიერთობები ჩინეთთან. ვიზიტის ფარგლებში ჩატარდა საკმაოდ მაღალი დონის შეხვედრები, რაც დიდ შესაძლებლობას უხსნის ჩვენს ქვეყანას, ჩვენი ქვეყნის ეკონომიკის განვითარებას, – ამის შესახებ დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, დავით სონღულაშვილმა შანხაიში ჟურნალისტებთან საუბრისას განაცხადა.
როგორც დავით სონღულაშვილმა აღნიშნა, ჩინეთში ვიზიტი სრულდება და შეხვედრებზე კიდევ ერთხელ გაესვა ხაზი საქართველო-ჩინეთს შორის თანამშრომლობას.
„დღევანდელ დღეს მთავრდება ვიზიტი. ბოლო შეხვედრები გვქონდა შანხაიში. მოგეხსენებათ, რომ შანხაი ჩინეთის ერთ-ერთი მნიშვნელოვანი ეკონომიკური ცენტრია და საკმაოდ მნიშვნელოვანია შანხაისთან ცალკე მდგომად განხილვა ეკონომიკური ურთიერთობებისა. ჯამში, როგორც შანხაის, მთლიანად ჩინეთს აქვს ამოუწურავი შესაძლებლობები. მინდა, აღვნიშნო, რომ ჩინეთი ეკონომიკის სიდიდით მსოფლიოში მეორე ქვეყანაა. შესაბამისად, შესაძლებლობები უსაზღვროა და მნიშვნელოვანია, ჩვენს ქვეყანას და ჩინეთს შორის მაქსიმალურად გამოყენებული და ათვისებული იყოს ის შესაძლებლობები, პოტენციალი, რომელიც ამ ქვეყანას აქვს, დაწყებული სავაჭრო ურთიერთობებიდან, ასევე, იმ დიდი პერსპექტივის განვითარებით, რასაც შუა კორიდორი ჰქვია ჩვენი ქვეყნის ეკონომიკისთვის. ჯამში, კიდევ ერთხელ გაესვა ხაზი ორ ქვეყანას შორის თანამშრომლობას“, – განაცხადა დავით სონღულაშვილმა.