იემენელი ჰუსიტების სახელით ცნობილი მოძრაობა „ანსარ ალაჰი“ აცხადებს, რომ რუსეთისა და ჩინეთის გემებს წითელ ზღვაში არანაირი საფრთხე არ ემუქრება. ამის შესახებ რუსულ გამოცემა „იზვესტიას“ „ანსარ ალაჰის“ პოლიტბიუროს წევრმა, მუჰამად ალ-ბუჰაიტიმ განუცხადა.
„ჩვენ გავაგრძელებთ იერიშებს ბრიტანულ და ამერიკულ გემებზე. რაც შეეხება სხვა ქვეყნებს, მათ შორის რუსეთსა და ჩინეთს, მათ გემებს არანაირი საფრთხე არ ემუქრება. მეტიც, მზად ვართ, უზრუნველვყოთ მათი გემების უსაფრთხოება“, – აღნიშნა მუჰამად ალ-ბუჰაიტიმ.
მისივე თქმით, ჰუსიტების მიზანი არა რომელიმე ცალკეული გემის ჩაძირვა, არამედ ისრაელისთვის პრობლემების შექმნაა, რათა მან ღაზის სექტორში ომი შეწყვიტოს.
12 იანვარიდან მოყოლებული აშშ და დიდი ბრიტანეთი საჰაერო დარტყმებს ახორციელებენ იემენში ჰუსიტების სამიზნეებზე. აშშ-მა მოძრაობა „ანსარ ალაჰი“, ცნობილი იემენელი ჰუსიტების სახელით, ტერორისტთა გლობალურ სიაში ხელახლა შეიყვანა.