უნდა მივეჩვიოთ იმას, რომ ცუდისა და კარგის გარჩევა შეგვეძლოს. არ უნდა იყოს ასე, რომ ერთი კონკრეტული მისამართიდან ყველაფერი კარგია, მეორიდან კი – ყველაფერი მიუღებელი, – ამის შესახებ მედიასთან „ხალხის ძალის“ ერთ-ერთმა ლიდერმა, დეპუტატმა დიმიტრი ხუნდაძემ განაცხადა.
დიმიტრი ხუნდაძემ ისაუბრა აშშ-ის მხრიდან საქართველოს მიმართ არაპარტნიორულ ურთიერთობაზე, რაც, მისი თქმით, ამერიკის მხრიდან სხვადასხვა ფორმით გამოიხატა.
„პარტნიორული ურთიერთობები, პირველ რიგში, თანასწორუფლებიანობასა და ურთიერთპატივისცემას გულისხმობს და არა იმას, რომ როცა დეპუტატებმა გარკვეულ საკითხებთან დაკავშირებით აშშ-ის მაშინდელ ელჩს, კელი დეგნანს მივმართეთ, იქიდან შეურაცხმყოფელი პასუხები მივიღეთ (მან ტყუილად მონათლა ის ინფორმაცია, რომ მასსა და ბ-ნ ბიძინას შორის შეხვედრა შედგა, თუმცა შემდეგ თვითონვე აღიარა, რომ ასეთი შეხვედრა იყო); რომ თურმე, საელჩოებმა და უცხოეთიდან დაფინანსებულმა ენჯეოებმა ქვეყნის პოლიტიკის ფორმირების ყველა სფეროში უშუალო მონაწილეობა უნდა მიიღონ, დეპუტატს კი ელჩისადმი კითხვის დასმის უფლებაც არ აქვს. რასაც კელი დეგნანი აკეთებდა, ის რომ აშშ-ში ქართველმა დიპლომატმა გააკეთოს რომელიმე კონგრესმენისადმი, ამას რა რეაქცია მოჰყვება, წარმოიდგინეთ. ასეთი ვასალური დამოკიდებულება კი, რომ ერთი მხრიდან შეიძლება და მეორე მხრიდან – არა, მიუღებელია“, – განაცხადა დიმიტრი ხუნდაძემ.