ბოლო 2 წელიწადში ბევრი ევროპული ილუზია დაიმსხვრა. მაგალითად, ილუზია იმის შესახებ, რომ მშვიდობა მუდმივია, ეკონომიკური კეთილდღეობა უფრო მეტს ნიშნავს პუტინისთვის, ვიდრე თავისუფალი და დამოუკიდებელი უკრაინის ნგრევა, – ამის შესახებ ევროკომისიის პრეზიდენტმა, ურსულა ფონ დერ ლაიენმა განაცხადა.
„დაიმსხვრა ის ილუზიაც, რომ ევროპა აკეთებდა ყველაფერს უსაფრთხოების კუთხით და ეს ეხება კიბერუსაფრთხოებას, სამხედრო, ეკონომიკურ მიმართულებას. ჩვენ ვიხედებით გარშემო და ვხედავთ, რომ აღარ არის დრო ილუზიებისთვის. პუტინმა დრო გამოიყენა ამ ომისთვის მოსამზადებლად და მსოფლიო დღეს ისეთი სახიფათოა, როგორც ათწლეულების განმავლობაში იყო. რუსეთის მიერ დაწყებული სასტიკი ომი უკრაინის წინააღმდეგ მესამე წელია მიმდინარეობს და ისეთი ინტენსიურია, როგორც არასდროს. როგორც ფინეთის პრეზიდენტმა განაცხადა, ევროპამ უნდა გაიღვიძოს და მე დავამატებდი – დაუყოვნებლად უნდა გაიღვიძოს. სასწორზეა კეთილდღეობა და თავისუფლება. უნდა დავიწყოთ მუშაობა ევროპის მომავალი უსაფრთხოების არქიტექტურაზე. ჩვენ სწრაფად უნდა ვიმოქმედოთ. ბოლო ორმა წელმა აჩვენა, რომ ევროპა ერთიანია და იქნება უკრაინის გვერდით ბოლომდე“, – აღნიშნა ევროკომისიის პრეზიდენტმა.