ჩვენ დავბრუნდებით სახლებში, რათა ჩვენ კოლეგებს და ამომრჩევლებს ვუთხრათ, რომ საქართველოში ნამდვილად პროგრესია, – ამის შესახებ ამერიკელმა კონგრესმენმა, დევიდ პრაისმა საქართველოს პარლამენტის თავმჯდომარე, ირაკლი კობახიძესთან გამართული შეხვედრის შემდეგ განაცხადა.
როგორც კონგრესმენმა აღნიშნა, ის და მისი კოლეგები ძალიან კმაყოფილები არიან იმ შეხვედრითა და დიალოგით, რომელიც ქართველ კანონმდებლებთან გაიმართა. როგორც დევიდ პრაისმა განაცხადა, ის საქართველოში ორი წლის წინ იმყოფებოდა და დღევანდელი ვიზიტის შემდეგ ის ხედავს, რომ ქვეყანაში საკმაოდ ბევრი ცვლილება მოხდა.
”ჩვენი საკანონმდებლო ორგანოების თანამშრომლობა 10 წლის წინ დაიწყო და ჩვენ შევეცადეთ შეგვეტანა პარლამენტში ჩვენი გამოცდილება, საპარლამენტო მშენებლობის თავალსაზრისით. პარლამენტი არის წარმომადგენლობითი დაწესებულება. იგი ძალზედ ეფექტურად მოქმედებს. მოქმედებეს სახალხო სურვილის, სახალხო სწრაფვების გამოხატვით, მაგრამ ამავე დროს ეს არის მრავალმხრივობის, მრავალფეროვნების გამოხატულების საშუალება, მათი აზრების ვინც უმცირესობაში არიან და შესაბამისად, საქართველოც გაუყვება ამ მრავალფეროვნების, მრავალმხრივობის გზას. ნამდვილად აღტაცებულები ვართ საქართველოთი, იმ ბრძოლით, რომელსაც თქვენ უკვე მრავალი წელია აწარმოებთ. იმ მხარდაჭერით, რომელსაც თქვენ წევთ ავღანეთში, სადაც 31 ქართველი მებრძოლი დაიღუპა სამშვიდობო ოპერაციებისას. ნატო-სთან ერთად თქვენი საქმიანობა, ნამდვილად იმსახურებს ყველაფერ დადებითს. საქართველომ ბევრს რამეს მიაღწია უკვე. თქვენ მიიღებთ უვიზო რეჟიმს, თავისუფალი მოგზაურობის საშუალებას ევროპის ქვეყნებში და ეს ძალზედ მნიშვნელოვანია ორმხრივი დადებითი ურთიერთობების განვითარებისთვის არამხოლოდ შენგენის მასშტაბით, არამედ ევროპის დანარჩენ ქვეყნებშიც. ჩვენ დავბრუნდებით სახლებში, რათა ჩვენ კოლეგებს და ჩვენს ამომრჩველებს ვუთხრათ, რომ საქარველოში ნამდვილად პროგრესია, წინ მიიწევს ქვეყანა და რასაკვირველია წარმატებას ვუსურვებთ სუვერენიტეტის, ტერიტორიული მთლიანობის და შემდგომი განვითარების ასპარეზზე”, – განაცხადა ამერიკელმა კონგრესმენმა დევიდ პრაისმა.