ჩვენ რომ სიღარიბე 20%-დან 15%-მდე ჩამოვიყვანეთ, ამ 15%-ს ძალიან აწუხებს ეს ფასები ჯერ კიდევ, რა თქმა უნდა. სხვებსაც აწუხებთ და არა მხოლოდ ამ 15%-ს, მაგრამ როდესაც სიტუაციას 2012 წელს ადარებენ, ეს არის თავხედობა, – ამის შესახებ საპარლამენტო უმრავლესობის ლიდერმა და „ქართული ოცნების“ აღმასრულებელმა მდივანმა მამუკა მდინარაძემ ჟურნალისტებთან ისაუბრა.
„საშუალო ხელფასები რომ ვნახოთ, საშუალო შემოსავალი რომ ვნახოთ, სიღარიბის მაჩვენებელი რომ ვნახოთ, ადამიანებს შეიძლება აღიზიანებდეთ მხოლოდ ციფრებით ლაპარაკი, მაგრამ შედარებით არის უკეთესი სიტუაცია. რა თქმა უნდა, შედარებით. ეს გამოწვევაა დღემდე, ფასებიც გამოწვევაა. როდესაც ინფლაცია მაღალი იყო, მაშინ ეს აქა-იქ ახსენდებოდათ, რადგან მაშინ სიტყვა „რუსული“ იყო აქტუალური. როდესაც კოვიდპანდემიისას ინფლაცია მაღალი იყო და ფასები გაიქცა, მაშინ არ ლაპარაკობდნენ ამაზე იმიტომ, რომ მაშინ სხვა აქტუალური საკითხი იყო და რუსულობა უნდა დაებრალებინათ ხელისუფლებისთვის. ახლა, როდესაც ინფლაციის სიმცირით პირველ ადგილზე ვართ ევროკავშირის კანდიდატ ქვეყნებს შორის, ახლა გაახსენდათ ეს საკითხი, იცით რატომ? უნდათ გადაფარონ, რომ ისინი დგანან ლგბტ პროპაგანდის მხარეს“, – აღნიშნა მდინარაძემ.