პრემიერ-მინისტრმა კაია კალასმა ქვეყნის პარლამენტის (რიიგიკოგუ) წევრებს დაუდასტურა, რომ ესტონეთი, ევროკავშირის სხვა ქვეყნების მსგავსად, თავის ჯარისკაცებს უკრაინის ომში არ გაგზავნის.
გასულ კვირას, საფრანგეთის პრეზიდენტმა ემანუელ მაკრონმა განაცხადა, რომ უკრაინაში სახმელეთო ჯარების გაგზავნის შესაძლებლობა არ უნდა გამოირიცხოს. თუმცა, ევროკავშირის სხვა ქვეყნების ლიდერებმა მოვლენების ამ გზით განვითარების შესაძლებლობა უარყვეს.
ოთხშაბათს, 6 მარტს, ოპოზიციონერმა დეპუტატებმა თავისი ქვეყნის პრემიერს ამ საკითხზე ესტონეთის პოზიციის შესახებ კითხვები დაუსვეს.
„ვაკეთებ იმას, რასაც ყველა სხვა ქვეყნის ლიდერი აკეთებს – ვცდილობ იმ ყალბი შეხედულების გაცამტვერებას, რომელიც ყველა თარგმანში გამოჩნდა. ეს ცრუ ინფორმაცია უკრაინაში სახმელეთო ჯარების გაგზავნას შეეხება. საუბარი იყო იქ სახმელეთო ჯარების გაგზავნაზე, ჯარისკაცების გაგზავნაზე… დაბეჯითებით შემიძლია გითხრათ, რომ ჩვენი ჯარისკაცები უკრაინაში საბრძოლველად არ წავლენ. ამაში მე ისევე შემიძლია დაგარწმუნოთ, როგორც სხვა ქვეყნების ლიდერებმა“, – განუცხადა კალასმა რიიგიკოგუ წევრებს.
ესტონეთის პრემიერმა ასევე აღნიშნა, რომ ომში ჩაბმის ყველა ქვეყანას ეშინია და მან იცის, რა თქვეს ამის შესახებ სხვა სახელმწიფოების მეთაურებმა. გარდა ამისა, უკრაინა საბრძოლო მასალას და საჰაერო თავდაცვის აღჭურვილობას ითხოვს და არა სახმელეთო ძალებს.
„ამიტომ, იმისათვის, რომ ომში არ აღმოვჩნდეთ, მთელი ძალისხმევა იმისკენ უნდა მივმართოთ, რომ უკრაინაში მიმდინარე ომი დასრულდეს. სწორედ ეს არის ის, რაც უკრაინელება გვთხოვეს. მათ არ უთხოვიათ ჯარისკაცები, არ უთხოვიათ სახმელეთო ძალები, ისინი გვთხოვენ საბრძოლო მასალას, საჰაერო თავდაცვას, ჯარისკაცების წვრთნას და ჩვენ ამას ვაკეთებთ. მათ ასევე ითხოვეს მხარდაჭერა. მათ ითხოვეს პოლიტიკური იზოლაცია [რუსეთის] და ჩვენ ამ მიმართულებით ყველაფერს ვაკეთებთ“, – განაცხადა კაია კაალსმა.
კალასმა ეს განცხადება ოთხშაბათს რიიგიკოგუს სხდომაზე გააკეთა, რომელიც საკმაოდ მწვავე გამოდგა, რადგან ოპოზიციური „კონსერვატიული-სახალხო პარტიის“ (EKRE) წევრები მათ მიერ დასმულ კითხვებზე მიღებული პასუხებით უკმაყოფილონი დარჩნენ.
დეპუტატმა ვარო ვუგლაიდმა პრემიერ-მინისტრს სამი შეკითხვა დაუსვა: 1) შეუძლია თუ არა მას დაადასტუროს, რომ ესტონეთის თავდაცვის ძალების არც ერთი მოქმედი სამხედრო მოსამსახურე ან რეზერვისტი არ ყოფილა გაგზავნილი უკრაინაში საომარ მოქმედებებში რაიმე სახით მონაწილეობის მისაღებად; 2) შეუძლია თუ არა მას გარანტია მისცეს, რომ, როგორც პრემიერ-მინისტრი, უკრაინაში ქვეყნის თავდაცვის ძალებს არ გაგზავნის; 3) ომის დაწყების შემთხვევაში, დარჩება თუ არა ის ესტონეთში.