ბათუმში „ლეგენდების სერიის“ პირველი მატჩის შემდეგ „ინტერის“ და იტალიის ნაკრების ვეტერანმა ფეხბურთელმა, მარკო მატერაციმ ბათუმის სტადიონზე შექმნილ ატმოსფეროს ფანტასტიკური უწოდა.
„ფანტასტიკური ატმოსფერო იყო. როგორც წესი, მსგავს მატჩებში ერთადერთი საეჭვო ისაა ხოლმე, სურს თუ არა ხალხს ვეტერანების თამაშის ყურება, მაგრამ ვხედავთ, რომ ბათუმის პუბლიკის პასუხი საოცარია – სტადიონზე ამდენი მაყურებელი ყველა ასეთ მატჩში არ მოდის. კარიერის დასრულების შემდეგ ასეთ მატჩებში ბევრჯერ მითამაშია და გულწრფელად გეუბნებით, ბოლომდე სავსე სტადიონი პირველად ვნახე. ყველამ კარგად ითამაშა და ყველამ მაქსიმუმი გააკეთა, მაგრამ დღეს მოედანზე საუკეთესო ფეხბურთელი, რა თქმა უნდა, ლუიშ ფიგუ იყო”, – აღნიშნა მატერაციმ.
„ლეგენდების სერიის“ პირველ მატჩში ვეტერანი ქართველი ფეხბურთელები „ინტერის“ ვარსკვლავებთან 0:2 დამარცხდნენ. „ინტერის“ შემადგენლობაში ორივე გოლი პორტუგალიელმა ლუიშ ფიგუმ გაიტანა.