ქართველმა ხალხმა, ოჯახებმა თავის თავზე გამოცადეს იმ სისტემის დამანგრეველი, შეურაცხმყოფელი, ღირსების ამყრელი შედეგები, რაც ადეიშვილმა და სააკაშვილმა განახორციელეს ამ ქვეყანაში, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებთან განაცხადა.
მისი თქმით, ადეიშვილი ქართული საზოგადოებისთვის მისაღები ვერ იქნება.
„ქართველმა ხალხმა, ოჯახებმა თავის თავზე გამოცადეს იმ სისტემის დამანგრეველი, შეურაცხმყოფელი, ღირსების ამყრელი შედეგები, რაც ადეიშვილმა და სააკაშვილმა განახორციელეს ამ ქვეყანაში. საერთოდ არ სჭირდება ამას მართლმსაჯულება. მართლმსაჯულება არის დამატებით ფორმალური მტკიცებულება, მაგრამ სამართლებრივის გარდა ამას აქვს სხვა, მორალური, პოლიტიკური, ადამიანური მდგენელი. ამ ადამიანმა ათასობით ადამიანი გააუბედურა ამ ქვეყანაში, უკანონო პატიმრობაში ამყოფა, აწამა, ციხეებში შექმნა სისტემა, რომელსაც თავისი სისასტიკით ვერ უტოლდებოდა ყველაზე სასტიკი რეჟიმები მსოფლიოში, გაუპატიურებებით და ა.შ. და ამას მართლმსაჯულება, სამართლებრივი მხარეც რომ არ ჰქონდეს, აქვს უბრალოდ სამწუხარო ისტორიული ე.წ. ბექგრაუნდი, რომელიც არის ყველა ადამიანის გონებაში ჩაბეჭდილი უბინძურესად. შესაბამისად, ადეიშვილი ვერ იქნება ის ადამიანი, რომელიც მისაღები იქნება ქართული საზოგადოებისთვის, მით უმეტეს, როდესაც ხედავენ მას ევროპელ ლიდერებთან ერთად და უმაღლესი რანგის შეხვედრებზე. ყველას ვთხოვ, მოერიდონ ისეთ საქციელებს, რომელიც აზიანებს ევროპულ და დასავლურ განწყობებს საქართველოში. ეს ჩვენთვის კატეგორიულად მიუღებელია“, – აღნიშნა მამუკა მდინარაძემ.