ქართული კანონმდებლობის, სამართლის მიერ ზურაბ ადეიშვილი არის მსჯავრდებული 5 საქმეზე. რამ შეიძლება დააკომპენსიროს ის, რომ ეს ადამიანი ევროსტრუქტურებში კონკრეტულ შეხვედრებს ესწრება, ჩემთვის ამოუცნობია, – ამის შესახებ „ქრონიკის“ ეთერში პარლამენტის ვიცე-სპიკერმა, ნინო წილოსანმა განაცხადა.
„არ ვიცი, რამდენად შეიძლება გადაწონოს რაიმე საფუძველი იმან, რომ ქართული კანონმდებლობის, სამართლის მიერ ზურაბ ადეიშვილი არის მსჯავრდებული 5 საქმეზე. ეს საქმეები არის დაწყებული ადამიანის წამებიდან, დასრულებული ბიზნესის ტერორით. ადეიშვილის ანგარიშზე არის არაერთი სხვა შემთხვევა, რომლისთვისაც, დარწმუნებული ვარ, მას ჯერ სასჯელი არ მიუღია. ალბათ უამრავ ადამიანს ახსენდება ადეიშვილთან და მის სტრუქტურასთან ურთიერთობის საკუთარი გამოცდილება. ამის პარალელურად, რამ შეიძლება დააკომპენსიროს ის, რომ ზურაბ ადეიშვილი ევროსტრუქტურებში კონკრეტულ შეხვედრებს ესწრება, ჩემთვის ამოუცნობია. რა თქმა უნდა, ჩვენ სათანადოდ დავაფიქსირეთ პოზიცია. ჩვენ ვიცავთ ჩვენი ქვეყნის კანონის უზენაესობას და მოვითხოვთ ყველა ჩვენი პარტნიორისგან, რომ ჩვენი ქვეყნის კანონის უზენაესობა, ინტერესები და სამართლის უპირატესობა დაიცვან. გულდასაწყვეტია, რომ როდესაც უკრაინის და უკრაინელი ხალხის ბენეფიტებით სარგებლობს ადეიშვილი და ამ პოზიდან კონკრეტულ დელეგაციაში ხვდება ევროპელ პარტნიორებს, ამ დროს, უკრაინის მხარემ და ევროპული ქვეყნების წარმომადგენლებმა უპირატეს პოზიციაში უნდა დააყენონ საქართველოს, როგორც მათი პარტნიორის და ევროკავშირის კანდიდატი ქვეყნის ინტერესები და პატივი სცენ ჩვენს კანონის უზენაესობას“, – აღნიშნა ნინო წილოსანმა.