პრეზიდენტმა გიტანას ნაუსედამ ბალეტის მოცეკვავეს, ილზე ლიეპას და „კაგებეს“ ყოფილ ოფიცერს, ბიზნესმენ იური კუდიმოვს, გამონაკლისის წესით, ლიეტუვას მოქალაქეობა ჩამოართვა.
„პრეზიდენტმა ხელი მოაწერა ორ ბრძანებულებას ილზე ლიეპასა და იური კუდიმოვის შესახებ“, – განუცხადა ხუთშაბათს, 7 მარტს ნაუსედას პრეს-მდივანმა, რიდას იასიულიონისმა სააგენტო „ბალტიკ ნიუს სერვისს“ (BNS).
გასულ თვეში, მოქალაქეობის საკითხების კომისიამ რეკომენდაცია მისცა ქვეყნის პრეზიდენტს, რომ ლატვიის მოქალაქეობა ორივე მათგანისთვის გაეუქმებინა.
ელზა ლიეპასთვის, რომელსაც ლიეტუვური და რუსული პასპორტები აქვს, ლიეტუვას მოქალაქეობის ჩამორთმევის ინიციატივა მას შემდეგ გაჩნდა, რაც ცნობილმა ბალერინამ რუსულ მედიასთან ინტერვიუში ბალტიისპირეთის ქვეყნების ქცევა დაგმო და პრეზიდენტ ვლადიმერ პუტინის მიერ უკრაინაში წარმოებული ომის მიმართ მხარდაჭერა გამოხატა.
რაც შეეხება კუდიმოვისთვის ლიუტუვას მოქალაქეობის ჩამორთმევას, ეს გადაწყვეტილება მოჰყვა სახელმწიფო უშიშროების დეპარტამენტის მოხსენებას, რომლის თანახმად, 1998 წელს, ლიეტუვას მოქალაქეობის მიღებისას, მან დამალა ზოგიერთი პირადი მონაცემი, მათ შორის ის, რომ საბჭოთა კავშირის „კაგებეს“ დაზვერვის ოფიცერი იყო.
ლიეტუვას უშიშროების სამსახურს მიაჩნია, რომ კუდიმოვის ხანგრძლივი კონტაქტები რუსეთის სპეცსამსახურებთან და მაღალჩინოსნებთან დაკავშირებულ პირებთან, აგრეთვე მისი საქმიანობა რუსეთის რეჟიმისთვის სტრატეგიული მნიშვნელობის ეკონომიკურ სექტორებში და საზღვარგარეთ რუსეთის გავლენის ოპერაციებთან კავშირი, საფრთხეს უქმნის ლიეტუვას უსაფრთხოების ინტერესებს.
„მოქალაქეობის შესახებ“ კანონის თანახმად, პირმა, რომელმაც გამონაკლისის წესით მიიღო ლიეტუვას მოქალაქეობა, შეიძლება დაკარგოს ის, თუ მისი ქმედება საფრთხეს უქმნის ლიეტუვას უსაფრთხოების ინტერესებს, ასევე, თუ ეს პირი საჯაროდ გამოხატავს იმ სახელმწიფოს მხარდაჭერას, რომელიც საფრთხეს უქმნის ლიეტუვასა და ევროკავშირის სხვა წევრი ქვეყნების, ან მათი მოკავშირეების ინტერესებს.
კანონის ამ მოთხოვნებიდან გამომდინარე, გასულ წელს პრეზიდენტმა ნაუსედამ უკვე ჩამოართვა ლიეტუვას მოქალაქეობა ყინულზე მოციგურავე მარგარიტა დრობიაზკოს, რომელიც, ლიეტუველ მეუღლესთან, პოვილას ვანაგასთან ერთად, რუსეთის პრეზიდენტის პრეს-მდივნის მეუღლის მიერ ორგანიზებულ პროექტებში მონაწილეობდა.