გუშინ წლისთავი იყო ამ „ფეიკკამპანიის“ და ეს იყო საუკუნის აფერა, რომ ამერიკული კანონი და მისი პირდაპირი თარგმანი შეასაღეს საზოგადოებას და ახალგაზრდების ნაწილს როგორც რუსული კანონი. ახლა ამ ლგბტ პროპაგანდის წინააღმდეგ მიმართულ კანონს რუსული კი არა, სულ რომ საბჭოთა ეძახონ, ჩვენ ამას ბოლომდე მივიყვანთ, – ამის შესახებ ჟურნალისტებს საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ განუცხადა.
„რა ტექსტიც წავიკითხე, ეს არის პირდაპირი რეკომენდაცია იმასთან დაკავშირებით, რომ ჯერ დაწეროს „ქართულმა ოცნებამ“ კანონი ლგბტ პროპაგანდის წინააღმდეგ, და შემდეგ ააგორონ, ისევე როგორც ეს გააკეთეს შარშან მარტში. მგონი, მეტი კომენტარი ამას არ სჭირდება. გუშინ წლისთავი იყო ამ „ფეიკკამპანიის“ და ეს იყო საუკუნის აფერა, რომ ამერიკული კანონი და მისი პირდაპირი თარგმანი შეასაღეს საზოგადოებას და ახალგაზრდების ნაწილს როგორც რუსული კანონი. ახლა ამ ლგბტ პროპაგანდის წინააღმდეგ მიმართულ კანონს რუსული კი არა, სულ რომ საბჭოთა ეძახონ, ჩვენ ამას ბოლომდე მივიყვანთ. ეს არის თანამედროვეობის უდიდესი გამოწვევა. ეს არ არის ჰაერიდან მოტანილი თემა. ჰაერიდან მოტანილ თემაზე არ ლაპარაკობს რომის პაპი, არ ლაპარაკობენ ადამიანები, რომლებიც ეროვნული იდენტობის და მსგავსი საკითხების შენარჩუნებაზე ზრუნავენ თანამედროვე ცივილიზებულ სამყაროში. როდესაც ოფიციალურ სტრუქტურებშიც კი შეაღწია თემამ, რომ უნდა აიკრძალოს საუბარი დედასა და მამაზე და მხოლოდ მშობელი უნდა ვახსენოთ, ამას ჩვენ უნდა დავუპირისპირდეთ. ჩვენს მეგობრებს, თუკი მათთანაც არის ეს სერიოზული პრობლემები, უნდა ვუთხრათ, რომ ეს არ არის სწორი მიდგომა და მიუღებელია ქართული საზოგადოებისთვის. ისევე როგორც მიუღებელია არატრადიციული ცხოვრების წესიდან გამომდინარე ქორწინების დაშვება. ამიტომ ჩვენ 2017 წელს წინასწარვე გავიმყარეთ პოზიციები და კონსტიტუციაში ჩავწერეთ, რომ ქორწინება არის ოჯახის შექმნის მიზნით ქალისა და მამაკაცის კავშირი. ეს საკითხი არ გადაიხედება. აქედან გამომდინარე, უკვე გაიშიფრა, რომ „პრაიდის“ წარმომადგენლები თურმე იქით აძლევენ რეკომენდაციებს თავიანთ პატრონებს, როდის უნდა გააპროტესტონ კანონი, როდის უნდა დაარქვან რუსული და ა.შ. ეს სქემა ბოლომდე გაშიფრულია და ალბათ ქართული საზოგადოება თავის დასკვნებს გამოიტანს, თუ რა ხდებოდა შარშან, როდესაც ასევე სპეკულაციურად ამერიკულ კანონს რუსული დაერქვა“, – აღნიშნა მდინარაძემ.
„ქრონიკამ“ ექსკლუზიურად მოიპოვა ოპოზიციის სტრატეგია, რომელსაც ლგბტ პროპაგანდის წინააღმდეგ ბრძოლის საკითხზე პარტიები მიჰყვებიან და რასაც „თბილისი პრაიდი“ ათანხმებს საერთაშორისო პარტნიორებთან. წერილიდან ირკვევა, რომ „თბილისი პრაიდი“ სამოქალაქო საზოგადოებასთან ერთად კანონპროექტის დამტკიცების შემთხვევაში საპროტესტო აქციებს გეგმავს.