ჩემი ხაბე ჰყავთ დაბრიყვებული, მაგრამ პროგრესი აქვს, ქუჩა-ქუჩა სიარულიდან უკვე გადაინაცვლა სამზარეულოში და ჩემი ხაბე უკვე „კუხნაშიც“ დგას, – ამის შესახებ რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ, ირაკლი ზარქუამ განაცხადა.
მისი თქმით, „ნაციონალური მოძრაობა“ ცდილობს საზოგადოებას უთხრას, რომ მათზე ზრუნავენ.
„გასულ წელს რატომ არ შეისეირნეს ბაზარში? ან იმის წინ? ერთი ის გაიხსენონ 2012 წელს 30 პროცენტიანი უმუშევრობა რომ იყო ქვეყანაში, დღეს კი 15 პროცენტამდეა შემცირებული. სიღარიბის ზღვარს მიღმა, 31 პროცენტი რომ იყო და პრემიებს იჯიბავდნენ, მაშინ რატომ არ ახსოვდათ ბაზარი? იქ შესეირნება-გამოსეირნება და ფასების კონტროლი? ჩემი ხაბე ჰყავთ დაბრიყვებული და დადის ახლა ის. მაგრამ ერთი კარგია, პროგრესი აქვს, ქუჩა-ქუჩა სიარულიდან უკვე გადაინაცვლა სამზარეულოში და ჩემი ხაბე უკვე „კუხნაშიც“ დგას“, – განაცხადა ირაკლი ზარქუამ.
ლევან ხაბეიშვილის პიარკონსულტანტის, ჯერემი როზნერის მიერ დაგეგმილი პიარკამპანია მარცხს განიცდის. საპარლამენტო უმრავლესობაში მიაჩნიათ, რომ „ნაციონალური მოძრაობის“ ლიდერების მიერ პროდუქტის ფასებზე საუბარი მხოლოდ და მხოლოდ პიარსტრატეგიის ნაწილია. „ქართულ ოცნებაში“ აცხადებენ, რომ ოპოზიციის მიზანი აქტუალური თემებიდან საზოგადოების ყურადღების გადატანას ემსახურება.