ზურაბ აბაშიძემ თავად მიიღო გადაწყვეტილება თანამდებობის დატოვების თაობაზე. მინდა, მადლობა გადავუხადო მას სახელმწიფოს წინაშე მრავალწლიანი სამსახურისთვის და წარმატებები ვუსურვო ახალ თანამდებობაზე, – ამის შესახებ პრემიერ-მინისტრმა, ირაკლი კობახიძემ ჟურნალისტებს განუცხადა.
მისი თქმით, ზურაბ აბაშიძეს გადაწყვეტილება მიღებული ჰქონდა იქამდე, ვიდრე ირაკლი კობახიძე პრემიერი გახდებოდა.
„ზურაბ აბაშიძე 12 წლის განმავლობაში ხელმძღვანელობდა მიმართულებას, რასაც ჰქვია რუსეთთან ურთიერთობები. მე მას მადლობა გადავუხადე საჯაროდ და პირადად, ამ საქმიანობისთვის. თავად მიიღო ეს [თანამდებობის დატოვების] გადაწყვეტილება. გადაწყვეტილება მიღებული ჰქონდა იქამდე, ვიდრე მე დავინიშნებოდი საქართველოს პრემიერ-მინისტრად. შესაბამისად, ჩემს დანიშვნასთან არავითარი კავშირი ჰქონდა ამ გადაწყვეტილებას. მე მას გადავუხადე მადლობა და ახლა კიდევ ერთხელ, საჯაროდ ვუხდი მადლობას იმ 12-წლიანი საქმიანობისთვის, რომელიც მან განახორციელა“, – აღნიშნა პრემიერმა.
11 მარტს მთავრობის სხდომის დაწყების წინ ცნობილი გახდა, რომ რუსეთთან ურთიერთობის საკითხებში პრემიერ-მინისტრის მრჩევლად ზურაბ აბაშიძე გიორგი ქაჯაიამ შეცვალა, აბაშიძე კი პრემიერის მრჩევლად დაინიშნა.