ნაფიცმა მსაჯულებმა თავდაცვის სამინისტროს სერჟანტის, როინ შავაძის მკვლელობაში ბრალდებული ორი პირის მიმართ, გამამტყუნებელი ვერდიქტი მიიღეს.
აჭარის კონსტიტუციური უსაფრთხოების დეპარტამენტის უფროსის ყოფილი მოადგილე, ალი ბალაძე დამნაშავედ ცნეს შავაძის უკანონო დაკავებისა და მკვლელობის ორგანიზებაში, ყოფილი სპეცრაზმელი მამუკა ბერიძე კი – შავაძის უკანონო დაკავებასა და ჯგუფურად მკვლელობაში.
სასამართლომ ორივე ბრალდებულს, სასჯელის სახით, 12-12 წლით თავისუფლების აღკვეთა შეუფარდა. სამსახურებრივი უფლებამოსილების გადამეტება, ძალადობა, იარაღის გამოყენება, შეურაცხყოფა, განზრახ მკვლელობის ორგანიზება, წინასწარი შეცნობით უმწეო მდგომარეობაში მყოფის მიმართ – ეს იმ ბრალდებების არასრული ჩამონათვალია, რომელშიც ნაფიცმა მსაჯულებმა დაკავებულები დამნაშავედ ცნეს.
როინ შავაძე 2008 წლის 16 აგვისტოს მოკლეს. დაცვის მხარის განცხადებით, ეს იყო გაქცევის იმიტაცია, თითქოს ის გაქცევას აპირებდა ბადრაგირების დროს, რაც სიცრუეა და გამოძიებითაც დადასტურდა.
საქართველოს გენერალურმა პროკურატურამ თავდაცვის სამინისტროს ბრიგადის სერჟანტის 2008 წლის აგვისტოს ომის მონაწილის როინ შავაძის უკანონო დაკავების, განზრახ მკვლელობისა და სამსახურებრივი უფლებამოსილების გადამეტების ბრალდებით, 10 პირის მიმართ სისხლის სამართლებრივი დევნა 2023 წლის 29 ივლისს დაიწყო. არაერთმა ბრალდებულმა აღიარა ჩადენილი დანაშაული და სრულად ითანამშრომლა გამოძიებასთან. 2024 წლის 12 თებერვალს კი პროკურატურამ ამავე საქმეზე 2 ადამიანი დააკავა.