“არახამია იმ პროექტის თანამონაწილეა რომელმაც სააკაშვილი და მისი წრე შეიფარა, რათა საქართველოში ის კონტრაბანდული გზით შემოეგზავნათ”

არახამია იმ პროექტის თანამონაწილეა, რომელმაც სააკაშვილი და მისი წრე შეიფარა, რათა საქართველოში ის კონტრაბანდული გზით შემოეგზავნათ, არეულობა შემოეტანათ და ქვეყნის ომში ჩართვა უზრუნველეყოთ,- ამის შესახებ საპარლამენტო
უმრავლესობის წევრმა ირაკლი ქადაგიშვილმა განაცხადა.

მისივე თქმით, დავით არახამია არ აღიარებს საქართველოს და საქართველოს ხელისუფლებას, ქართველი ხალხის არჩევანს.

“დავით არახამია სულ მცირე, რეალობა რომ ავიღოთ, არ აღიარებს საქართველოს და საქართველოს ხელისუფლებას, ქართველი ხალხის არჩევანს. ის არის იმ პროექტის თანამონაწილე, რომელმაც მიხეილ სააკაშვილი და მისი წრე შეიფარა იმისთვის, რომ საქართველოში ის კონტრაბანდული გზით შემოეგზავნათ, ქვეყანაში არეულობა შემოეტანათ და ქვეყნის ომში ჩართვა უზრუნველყოთ. ეს არის რეალურად არახამიას შინაარსი და დამოკიდებულება საქართველოს მიმართ. აქედან გამომდინარეა ყველა მისი განცხადება განპირობებული.
კიდევ ერთხელ ვეტყვი არახამიას და ყველას, ვინც მის პოზიციასა და იდეოლოგიას იზიარებს, საქართველო არავისზე ნაკლები სახელმწიფო არ არის, ქართველი ერი, არავისზე ნაკლები ერი არ არის და მას მოვუწოდებ, რომ პატივი სცეს საქართველოს, როგორც სახელმწიფოს და ქართველი ხალხის არჩევანს.
რაც შეეხება იმ წვრილ-წვრილ ჭორიკანა ბრალდებებს, პირველ რიგში, საქართველო რომ არ არის რუსეთისთვის სანქციების არიდების ადგილი, ეს ძალიან ნათლად ჩანს იქიდან, რომ ყველა საერთაშორისო მონიტორინგი, რომელიც ამას ახორციელებს, საქართველოს ყველაზე უფრო მაღალ შეფასებას აძლევს. გავახსენებ არახამიას, რომ უკრაინა იყო ყველაზე დიდი, მათ შორის ერთ-ერთი ის სახელმწიფო, რომელიც ომის პერიოდშიც ვაჭრობდა რუსეთთან, მათ შორის აწარმოებდა კონტრაბანდულ ვაჭრობას და მისი მოკავშირე სახელმწიფოები არიან, ვინც რუსეთში ყველაზე დიდი ექსპორტიორები ხდებიან ხან ღვინის და ხან სხვადასხვა პროდუქციისა. ევროპის სახელმწიფოები არიან, ვინც ყველაზე მეტს, მათ შორის, ე.წ ორმაგი დანიშნულების საქონლით ვაჭრობენ რუსეთთან. ამიტომ, მას საქართველო დაბალი ღობე ნუ ჰგონია.
რაც შეეხება მათი ე.წ დაზვერვის ინფორმაციას, თითქოს საქართველოს სააკაშვილის გაშვება უნდოდა და მოსკოვმა უარი უთხრა. ეს ზღაპრები თავის რადაში თავის ფრაქციის წევრებს მოუყვეს და ამყოფოს ამ ტყუილში ისინი.
კიდევ, კარგად გაიხსენოს, როცა ყველას შეეშინდა და კიევი დატოვა, საქართველოს არ შეშინებია და თავისი დროშა კიევიდან არ მოუხსნია”, – განაცხადა ირაკლი ქადაგიშვილმა.