სულ ახლო წარსულში, გაიხსენეთ, სააკაშვილის სიმულირების როგორი დაფინანსება ხდებოდა ლობისტების მეშვეობით – მადლობა FARA-ს კანონს, რომელიც ჩვენთან რუსულად მონათლეს ამ ძალებმა. ახლა საკუთარ თავს აჯობეს – სიღარიბის რეკლამირება არის უბრალოდ უბედურება და ადამიანების გაჭირვებაზე საზიზღარი წურბელასავით პარაზიტირება, – ამის შესახებ „ქრონიკის“ ეთერში პარლამენტის დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ განაცხადა.
„სჯობს, შევახსენოთ მოქალაქეებს, თუ რა ძალასთან გვაქვს საქმე და რამდენად „მზრუნველი“ იყო ის. მათ არასოდეს აღელვებდათ ხალხი. საკუთარი ინტერესისთვის მათ შეეძლოთ გაენადგურებინათ ადამიანი, წაერთვათ ბიზნესი, დაერეკეტებინათ, დაეჭირათ აბსოლუტურად უმიზეზოდ. 300 000 პრობაციონერი გვყავდა და 30 000 პატიმარი – წარმოუდგენელი სტატისტიკაა. ამ ადამიანების ხელში იყო საპენსიო კრედიტი, 180%, რომელიც ჩვენი გუნდის, ამჟამინდელი პრემიერ-მინისტრის, საპარლამენტო გუნდის, ეროვნული ბანკის და სხვათა მეოხებით და თავად კერძო ინტერესის თვითშეზღუდვით დაიწია 26%-მდე. ჩვენსა და მათ შორის სოციალურ პაკეტებზე ზრუნვაში და კონკრეტულ ციფრებში მოცემულ რეალობაში არის ისეთი განსხვავება, როგორც ცასა და დედამიწას შორის.
რაც შეეხება ამ კამპანიას, მავნებლები არიან – სულ ახლო წარსულში, გაიხსენეთ, სააკაშვილის სიმულირების როგორი დაფინანსება ხდებოდა ლობისტების მეშვეობით. მადლობა FARA-ს კანონს, რომელიც ჩვენთან რუსულად მონათლეს ამ ძალებმა. ახლა საკუთარ თავს აჯობეს – სიღარიბის რეკლამირება ეს არის უბრალოდ უბედურება და ადამიანების გაჭირვებაზე საზიზღარი წურბელასავით პარაზიტირება. აბსოლუტურად გაყალბებული ბანერით დარბის ის კომიკური ფიგურა, ხაბეიშვილი. ჯერ პარტიის თავმჯდომარეა, წარმოიდგინეთ, რა დონეზეა დაცემული, რომ ხან კარტოფილით დარბის, ხან მაწვნით და ხან ბენზინით. რა განსხვავებაა ჩვენსა და მათ შორის? ჩვენს ხელში, თუ რამეზე ფასი იზრდება, ეს არის ჩვეულებრივი ეკონომიკური პროცესებით გამოწვეული მოვლენა, რომელიც, გასაგებია, ძალიან მძიმეა მოსახლეობის გარკვეული ნაწილისათვის, რაზეც ჩვენ ვღელავთ და ვზრუნავთ – მხოლოდ ვიშვიში არ შველის ამ საქმეს. მათ დროს სწორედ იმიტომ იყო საწვავი უფრო ძვირი, რადგან იყო მონოპოლიზებული და პარტიულ ყულაბაში მიდიოდა ის ნაღები, რომელიც ხელოვნურად იყო შექმნილი“, – აღნიშნა ოდიშარიამ.