ადეიშვილი რომ ბუნდესტაგში, ან საერთოდ ვინმეს მართლმსაჯულების რეფორმაზე ელაპარაკება, ეს არის ცინიზმის მწვერვალი, მეორე მხრივ კი ფარისევლობაა, როდესაც „ქართული ოცნება“ იძახის, რატომ შეხვდითო, – ამის შესახებ პარტია „მოქალაქეების“ ლიდერმა, ალეკო ელისაშვილმა საქართველოს პირველი არხის ეთერში განაცხადა.
„ისინი რა, დაჟინებული მზერით მიხვდებოდნენ, ადეიშვილი რომ ძებნილია, თუ რა? ადამიანი ძებნილი თუ არის, ის უნდა იძებნებოდეს ძებნის გამომცხადებელი ქვეყნის პროკურატურის მოთხოვნით ინტერპოლის მეშვეობით. მით უმეტეს, ადეიშვილისნაირი ადამიანი, რომელმაც წამებაში ამოხადა სული ნახევარ ქვეყანას, რომელიც ერთმნიშვნელოვნად უნდა იჯდეს ქართულ საპატიმროში და სასჯელს იხდიდეს, მაგრამ ის 2015 წლის შემდეგ აღარ იძებნება წითელი ცირკულარით. შესაბამისად, „ქართული ოცნება“ რომ ახლა თავს იკატუნებს, ეს არის ფარისევლობა. იქითა სასესიო კვირაში მე ამ საკითხს აუცილებლად დავსვამ, საჯაროდაც ვიტყვი ამ ამბავს და გამოვითხოვ კიდეც“, – აღნიშნა ელისაშვილმა.