მოძრაობა „ხალხის ძალის“ ერთ-ერთი ლიდერის, გურამ მაჭარაშვილის განცხადებით, სტრასბურგის საერთაშორისო სასამართლოს მიერ დადასტურებული და აღიარებულია, რომ სააკაშვილის რეჟიმი არის დანაშაულებრივი და უკრაინის ხელისუფლებაში ძალიან კარგად იციან, რომ ადეიშვილი იყო მაღალჩინოსანი სააკაშვილის ხელისუფლებაში.
„უკრაინაში ახლაც გაიგზავნა წერილი ადეიშვილთან დაკავშირებით და პასუხი უკვე მივიღეთ; მართალია, ზეპირი, მაგრამ არ მგონია, წერილობითი პასუხი განსხვავებული იყოს; არათუ არ გადმოგცემთო, პირიქით, აქეთ რაღაც პირობები დაგვიყენეს“, – აღნიშნა მაჭარაშვილმა.
მისივე თქმით, ზურაბ ადეიშვილს გარე ძალები მფარველობენ.
„დაისვა პრეტენზია, რატომ მოიხსნა ადეიშვილი ცირკულარიდან და რატომ არაფერი გააკეთა საქართველოს ხელისუფლებამ. ავიღოთ დღევანდელი სიტუაცია, დღეს ხომ უკვე მერამდენედ მივმართეთ ადეიშვილთან დაკავშირებით და დღესაც პირდაპირ უარს გვეუბნებიან. აქ რა პასუხია მაშინ? ელისაშვილის მხრიდან ეს, როგორც მინიმუმ, არაგულწრფელი განცხადებაა. ალეკო ელისაშვილმა ძალიან კარგად იცის, რომ ადეიშვილს სახეზეც ცნობენ, იციან, ვინ არის და უკრაინის ხელისუფლებაში კარგად იფარებენ. რას ამბობს ახლა ელისაშვილი, რომ ადეიშვილს არ იცნობენ უკრაინის ხელისუფლებაში და ევროპაში? ევროპული სახელმწიფოები არ იცნობენ თავიანთი ინსტიტუტის, ევროპული სასამართლოს გადაწყვეტილებას, რომ სააკაშვილის რეჟიმი დამნაშავედ არის გამოცხადებული? ლოგიკური დასკვნა სად მიდის? – იქითკენ, რომ მას მფარველობენ, აშკარად და პირდაპირ. მფარველობენ ის უცხოური ძალები, რომლებიც განაგებენ ასევე უკრაინის ხელისუფლებას. ჩვენი თუ არ სჯერა საზოგადოების იმ ნაწილს, რომელიც ამბობს, რომ „ხალხის ძალა“ არასწორ განცხადებებს აკეთებს, არესტოვიჩის მაინც დაიჯერონ, რომელიც უკრაინის ხელისუფლების ერთ-ერთი მაღალჩინოსანია. ის ერთი ერთში იმეორებს იმას, რასაც ჩვენ, „ხალხის ძალა“ ვამბობდით, რომ სამწუხაროდ, უკრაინის ხელისუფლება არ იმართება დამოუკიდებლად და იმართება სხვადასხვა ქვეყნიდან. ეს ძალებია ის ძალები, მათ შორის, ევროპარლამენტარები, რომლებიც ალაპარაკებდნენ – აისეირნეთ აფხაზეთში, მეორე ფრონტი გახსენით და ა.შ“, – განაცხადა მაჭარაშვილმა საქართველოს პირველი არხის ეთერში.