პარასკევს, 15 მარტს, ლატვიის სახელმწიფო პოლიციამ, რიგაში, რუსეთის ფედერაციის საელჩოსთან, ორი აგრესიული პირი დააკავა, რომლებსაც რუსეთის ფსევდო-საპრეზიდენტო არჩევნებში ხმის მიცემა სურდათ, მიუხედავად იმისა, რომ აღნიშნულ დღეს მათ ამის უფლება არ ჰქონდათ.
პოლიციის განცხადებით, პარასკევს, დაახლოებით 09:00 საათისთვის, რუსეთის საელჩოს საკონსულოსთან, „ხმის მიცემის“ მიზნით, რამდენიმე ადამიანი შეიკრიბა, თუმცა, მათ, პარასკევს და შაბათს, კენჭისყრაში მონაწილეობის მიღება არ შეეძლოთ. ლატვიაში რუსეთის საელჩოს შენობაში არჩევნების ჩატარება მხოლოდ კვირას, 17 მარტს არის შესაძლებელი.
პოლიციამ, შეკრებილი პირების ვინაობის დასადგენად, მათი დოკუმენტაცია შეამოწმა.
ორმა მათგანმა, ოფიცრების მოთხოვნაზე, წარედგინათ დოკუმენტები, უარი თქვა. ისინი აგრესიურად იქცეოდნენ, სამართალდამცავებს წინააღმდეგობას უწევდნენ, მიწაზე დაეცნენ და ხმამაღლა ყვიროდნენ. ამის შემდეგ, აღნიშნული პირები დააკავეს და შემდგომი პროცესუალური ქმედებების განსახორციელებლად, პოლიციის განყოფილებაში გადაიყვანეს.
ლატვიის პოლიცია საზოგადოებას შეახსენებს, რომ იმ ადგილებში, სადაც რუსეთის საპრეზიდენტო „არჩევნები“ ტარდება, სახელმწიფო პოლიცია და საზღვრის დაცვის სამსახური ამოწმებენ, აქვთ თუ არა რუსეთის მოქალაქეებს ლატვიაში ყოფნის კანონიერი ნებართვა და ამას თითოეული ამომრჩევლის პირადობის დამადასტურებელი დოკუმენტების და საცხოვრებელი ადგილის შემოწმების გზით აკეთებს.
პოლიცია ასევე განმარტავს, რომ იმ შემთხვევაში, თუ პირები უარს იტყვიან თავიანთი ვინაობის გამხელაზე, თანამდებობის პირებს შესაბამის ინფორმაციას არ მიაწვდიან, მათ კანონიერ მოთხოვნებს არ შეასრულებენ და სხვა დარღვევებს ჩაიდენენ, ისინი დაკავებულნი იქნებიან და მათი პასუხისმგებლობა კანონის მოთხოვნების შესაბამისად შეფასდება.
პოლიციის განცხადებით, ამ შაბათ-კვირას სამართალდამცავები გაძლიერებულ რეჟიმში იმუშავებენ, რათა უზრუნველყონ საზოგადოებრივი წესრიგი და უსაფრთხოება, ასევე კანონის დაცვა ლატვიაში, მათ შორის, – ომის დანაშაულების გამართლებისა და განდიდების თავიდან აცილების კუთხით.