დასავლეთის მოწოდების მიუხედავად, ისრაელი რაფაჰში სამხედრო ოპერაციის შეწყვეტას არ აპირებს, – ამის შესახებ ბენიამინ ნეთანიაჰუმ გერმანელ კოლეგასთან, ოლაფ შოლცთან შეხვედრის შემდეგ გამართულ ბრიფინგზე ისაუბრა.
გერმანიისა და ისრაელის პირველი პირების შეხვედრის მთავარი თემა სექტორში ზავის გამოცხადება და ჰუმანიტარული დახმარების გაძლიერება იყო.
„ვისაუბრეთ იმაზე, რომ ღაზის სექტორში მოსახლეობას კომპლექსური ჰუმანიტარული დახმარება სჭირდება. მნიშვნელოვანია გავითვალისწინოთ, რომ ახლა იქ ერთ-ნახევარი მილიონი მოქალაქეა, ბავშვები, მოხუცები და ბევრი, ვინც, უბრალოდ, სასოწარკვეთილია. მათი სიცოცხლე რისკის ქვეშაა. აუცილებელია გადაწყვეტილება, რომელიც უზრუნველყოფს მდგრად და გრძელვადიან უსაფრთხოებას. რაც შეიძლება, სწრაფად არის საჭირო ცეცხლის შეწყვეტა და მძევლების გათავისუფლების უზრუნველყოფა“, – აღნიშნა გერმანიის ფედერალურმა კანცლერმა ოლაფ შლცმა.
„ჩვენი მიზანი რაფაჰში დარჩენილი „ჰამასის“ მებრძოლების ლიკვიდაციაა და ამის ფონზე ყველაფერი კეთდება, რომ სამოქალაქო პირებმა ტერიტორია დატოვონ. თუ ომს ახლა შევაჩერებთ, ჩვენს მიზნებს ვერ მივაღწევთ. ეს იმის ნიშანი იქნება, რომ ისრაელმა ომი წააგო და ჩვენ ამას არ დავუშვებთ“, – განაცხადა ისრაელის პრემიერ მინისტრმა ბენიამინ ნეთანიაჰუმ.