პირადად გენერალური მდივანი სტოლტენბერგი არის საქართველოს ძლიერი მხარდამჭერი და მეგობარი, რომელიც მხარს გვიჭერს როგორც ჩვენი მისწრაფებების განხორციელებაში და სრულყოფაში, ასევე რეფორმების გატარებაში, თავდაცვისუნარიანობის ამაღლებაში, – ნატო-ში საქართველოს ელჩმა, ვიქტორ დოლიძემ განაცხადა.
„მან ძალიან კარგად იცის რეგიონი და ჩვენი ქვეყანა. ჩვენ მადლობელი ვართ, რომ ასეთ კრიტიკულ ვითარებაში, მსოფლიოში მიმდინარე მღელვარე პროცესების პარალელურად იგი ჩამობრძანდება საქართველოში და განვიხილავთ ჩვენი თანამშრომლობის საკითხების საკმაოდ ფართო სპექტრზე“, – აღნიშნა ვიქტორ დოლიძემ.
ნატო-ს გენერალური მდივანი იენს სტოლტენბერგი საქართველოში დღეს ჩამოვა. ჩრდილოატლანტიკური ალიანსის მიერ გავრცელებული ოფიციალური ინფორმაციით, გენერალური მდივანი სომხეთს, აზერბაიჯანსა და საქართველოს 17-19 მარტს ეწვევა. იენს სტოლტენბერგი თბილისში აზერბაიჯანიდან ჩამოვა. მას დაგეგმილი აქვს შეხვედრა პრეზიდენტ სალომე ზურაბიშვილთან და პრემიერ-მინისტრ ირაკლი კობახიძესთან. იენს სტოლტენბერგი ირაკლი კობახიძესთან ერთობლივ პრესკონფერენციას გამართავს.