პარლამენტის ევროინტეგრაციის კომიტეტის თავმჯდომარის, მაკა ბოჭორიშვილის განცხადებით, აფხაზეთის ე.წ. ხელისუფლება, იქნება ეს სასამართლო თუ ნებისმიერი სხვა შტო, არის სრულად რუსული ოკუპაციისა და გავლენის ქვეშ.
„გამოწვევა არ უნდა იყოს რამენაირად კითხვის ნიშნის ქვეშ დაყენებული, ან რამე კითხვები არ უნდა ჩნდებოდეს მასთან დაკავშირებით, როდესაც საქართველოს ხელისუფლების წარმომადგენლები საუბრობენ. აფხაზეთი არის ოკუპირებული რეგიონი, აფხაზეთის ე.წ. ხელისუფლება, იქნება ეს სასამართლო თუ ნებისმიერი სხვა შტო, არის სრულად რუსული ოკუპაციისა და გავლენის ქვეშ. შესაბამისად, მსგავსი განცხადებები არის დამაზიანებელი“, – აღნიშნა მაკა ბოჭორიშვილმა.
„დამოუკიდებლობის მაგალითი აფხაზი მოსამართლეებისგან“ , – ასე ეხმაურება საქართველოს პრეზიდენტი სალომე ზურაბიშვილი გავრცელებულ ინფორმაციას იმის შესახებ, რომ ოკუპირებული აფხაზეთის ე.წ. სასამართლომ ბიჭვინთის აგარაკების მესამე პირებისთვის გადაცემის აკრძალვის შესახებ კანონის გაუქმებას მხარი არ დაუჭირა.
მოგვიანებით, პრეზიდენტის ადმინისტრაციამ განაცხადა, რომ სალომე ზურაბიშვილის სიტყვების ინტერპრეტირება არის საზოგადოების შეგნებულად შეცდომაში შეყვანა და პრეზიდენტის დისკრედიტაციის კიდევ ერთი მცდელობა.